مساء الخير

فطيرة فلامكوخن هي بالأصل من مدينة إلزاس الفرنسية واسم الفطيرة بالفرنسي

Tarte Flambee

 وهذي المدينة تقع بين فرنسا و ألمانيا..و فيه بعض الأطباق مشتركة بين المطبخين ومنها الفلامكوخن..،وهي عبارة عن عجينة خبز رقيقة جدا ! وغالبا مافيها خميره..تكون دائرية او مستطيلة وتقطع مربعات

طيب ايش المميز فيها؟

مثل البيتزا هل ممكن نحط جبن غير الموتزاريلا! الفلامكوخن نفس الشي له توبينق معين او حشوات معينة.. و اللي هي :

• هام او بيكون (لحم مقدد) مع بصل مكرمل + جبن كريمي– هذي الحشوة الكلاسيكية
• خلطة أجبان معينة (موتزاريلا + غرويير+إمنتال الفرنسية) أو موتزاريلا+ بارميزان+إمنتال الفرنسية 
• جبن كريمي او كريم فريش+ سوَر كريم (أساس) و الاضافات الثانية يختلف من شخص لشخص او حسب الموسم يضيفون تين او هليون او لييك إلخ..ألذ شي ذقته زيتون و بيستو و رشة أوريغانو كان رهيييب..

 طبعا الحشوة الأولى مو حقتنا خخخخ الحشوة الثانية افضل شي ذقته خصوصا مع جبنة الغرويير…يعني بدون هذي الحشوات مايطلع معاكم فلامكوخن

الأماكن الشهيرة اللي تقدم الفلامكوخن

فيه كافيه شهير في غرب ألمانيا بثلاث مدن (فرانكفورت، ماينز، فيسبادن) اسمه 

La Maison du Pain

نظامه مثل بول تقريبا يقدم حلويات و مخبوزات و فطور..البريوش عندهم رهيب و الحلويات مااعجبتني مرا اعطيها ٧١٠ و السيرفس سيء في كل المدن الثلاث مدري ليش ههههههه بس مجملا كافيه جمييل جدا انصحكم تزورونه 

وهذي الفلامكوخن عندهم و الحشوة هي نفسها اللي اكتبها بالوصفه

————————-

المقادير:

300 جرام دقيق أبيض

2 م ك زيت زيتون

250 مل موية دافية او اقل حسب ماتتكون معكم العجينة و تصير طرية

م ص ملح

الحشوة :

كوب لكل من جبنة الموتزاريلا + الغرويير + إمنتال فرنسيه – مبشوره

تلقون جبنة الغرويير في جده بمحل الذواق بالتحلية..استبدلوا الغرويير بالبارميزان لو غير متوفر

————–

الفلامكوخن طريقة خبزه زي البيتزا بالضبط  بس مدة الخبْز أقل يعني لازم حجر البيتزا و يكون داخل الفرن فترة و حاار..ممكن نفس الطريقة تمشون عليها بصينية الكوكيز تدخلونه الفرن لين يصير حار..

نشغل الفرن على أعلى درجة و داخله صينية الخبْز أو البيتزا ستون

نخلط الدقيق مع الملح و الزيت زيتون و المويه نعجن لين تتكون عندنا عجينة طريه..نتركها ترتاح ٢٠ دقيقه بعدين نقسمها لكورتين و نفردهم فرد رقيق او نحيف دائري او مستطيل حسب ماتحبون..يفضل تفردونه على ورق زبده عشان يسهل عليكم نقلها للفرن

تخلطون الأجبان مع بعض وتوزعون الكمية على العجينتين..تدخلونه الفرن ماراح ياخذ وقت مرا لأن العجينة مو سميكه..بعد عشر دقايق شيكوا من تحت اذا حمرت و الجبن ذاب..

و بالعافية