صباح/مساء الخير

الزهرة أو القرنبيط من الأصناف نادرا نشوفها بأطباق غير الفتة أو المشوية بالفرن! أو بمرق كاري أحيانا نحتار كيف نطورها أو نعززلها بأشياء تطعم فيها

شوربة الزهرة من الأطباق اللي تحتاج تعزيز في الطعم بس بدون مبالغة و بدون بهارات زايدة لأن نكهته خفيفه و أي بهارات قوية ممكن ينهي الطبق بنتيجة عكسية

في هذي الوصفة عززت الطعم بطريقة بسيطة مره و بمقادير قليلة بس النتيجة كانت رهيييبه صار طعمه قريب من شوربة المشروم بطريقة غريبه بس لذيييذ جدا 😛

بعض الوصفات تنشوي فيه الزهرة قبل مايكمل طبخ مع باقي المقادير أنا ماشويته بس شوحته بالبداية مع بصل و ثوم زبدة لمدة ١٠ دقايق لين تشبع بالنكهات و طبخته بالحليب مباشره بدون مرق الخضار و البهارات عباره جوزة الطيب و فلفل أبيض فقط! وجبن بارميزان و بالاخير ملعقة كبيره زبادي أو ساور كريم إذا كان متوفر!

و هي من الشوربات اللي يحتاج نضيف لها إضافات في الطبق مثل خبز محمص..زهرة مشويه إضافيه..أو مقليه.. أو نيوكي مثل ماسويت

اللي ماوده يطبق الوصفة كامله ممكن يستغني عن النيوكي و يقدم مع الشوربة خبز محمص (كروتونز) بتطلع رهيبه برضو

بالنسبة للنيوكي هي وصفة بسيطة برضو سويتها مع الشبت واستغنوا عن الشبت لو حبيتوا تسوونه بطبق ثاني مع صوص بإختياركم لأن الطريقة وحده في النيوكي مافيها فلسفة كثير بس التزموا بالمقادير حتى يطلع مضبوط

النيوكي بالأساس عباره عن عجين من طحين و مويه مثل الدمبلينق و البطاطس المهروسه إضافة مستحدثة مؤخرا، وقوامه طري بدون مايعطي إحساس العلك! لأن أحيانا بسبب العجن الزايد الطحين يكون شبكة غلوتين يعطي القوام المطاطي للنيوكي

وحتى نتجنب هذي المشكلة بنبدا أول شي بطريقة النيوكي مع شرح الملاحظات و مقادير الوصفة عامه أو أساس لأي طبق نيوكي مختلف

---

نيوكي بالشبت

المقادير:

٤٠٠ جرام تقريبا بطاطس نشوية (قشرتها غامقه

٨٠ جرام طحين

صفار بيضه

ربع ملعقة صغير ملح و فلفل اسود

ملعقة كبيره جبنه بارميزان = ١٥ جرام

ملعقة كبيره شبت مفروم ناعم

---

الطريقة

نسلق البطاطس بقشرها بماء بدرجة حرارة الغرفه لمدة ٣٠ ل ٤٠ دقيقة ، وعلامة الاستواء إن تدخل الشوكة بسهولة ، و أهم شي مايكون استواء أكثر من اللازم حتى لا يمتص البطاطس الماء الزائد و مع خلطه بالطحين يتكون عندنا الغلوتين

بعد مايتسوي البطاطس نصفيه و نخليه يدفى لمدة ١٠ دقايق و نقشره باستخدام قلفز أفضل حتى لا يضايقكم حرارته، و يهرس بأداة الكبس لهرس البطاطس لو كانت غير متوفر ممكن تهرسونه بالطاحونه لازم يكون طحن ناعم جدا لأن بعض الأحيان يحتوي على حبيبات صعب هرسها

بعد مانطحن البطاطس نضيف الملح و الفلفل الأسود وهنا ذوقوا و عدلوا الطعم حسب ماتفضلون قبل إضافة باقي المقادير

و نترك البطاطس المهروسه حتى تدفى و نفردها على سطح نظيف و نحط صفار البيض و ننخل الدقيق وجبنة بارميزان مبشوره

ونبدا نطويها على بعضها حتى تتجانس من غير مبالغة بالعجن

وهنا نضيف الإضافات من شبت أو أي أعشاب ثانيه و نكمل عجن حتى نحصل على عجينة متماسكة (مو لازم ناعمه) وتلزق شوي باليد

نقسمها لأربع قطع وننثر دقيق عشان نقدر نشكلها و ماتلزق باليد

ونحاول في هذي المرحله ننثر دقيق لين يغلف حبات العجين حتى يسهل التشيكل بدون ماتلزق وإذا ماكان عندكم أداة تشكيل النيوكي أكيد تقدرون ببطن الشوكة عن طريق الضغط بوسط العجن ولفها

الكمية تكفي لأكثر من طبق بإمكانكم تحفظون الباقي بالفريزر تقسمونه بأكياس حسب كمية كل طبق اللي تحتاجونها

طريقة الطبخ

نجهز صحن فيه مناديل مطبخ متين..و نسخن لترين ماء ونحط عليه م ص و نص ملح و نطبخ النيوكي لمدة دقيقتين أدري البعض بيقول كثير و هو مثل الباستا الفريش فقط ثواني إلى أن يطفح على السطح! معكم حق ولكن أنا حبيت الاستواء بعد دقيقتين أفضل و ظل حافظ على طراوته

بعد الطبخ نشيل النيوكي على مناديل المطبخ حتى يمتص السوائل

وإذا بتحمرونه تكون الخطوه بعد هالمرحله..تجهزون مقلاه غير قابله للالتصاق (تيفال أو جرانيت) فيه قليل من الزبده أو زيت زيتون لين يسخن و تحطون حبات النيوكي حتى يحمر من الجهتين

ملاحظة:

في النيوكي يفضل باقي إضافات الطبق من صوص أو شوربة أو أي شي يكون جاهز لأن النيوكي ماينفع يبقى بعد الطبخ فترة طويلة

---

شوربة الزهره

المقادير:

من ٣٠٠ ل ٤٠٠ جرام زهره مقطعه

حبة بصل صغيره مقطعه مكعبات صغيره

١ فص ثوم مقطع شرايح

ثمن ملعقة صغيره جوزة الطيب مبشور

نص م ص فلفل أبيض مطحون

٧٥٠ مل حليب سائل

١٠٠ مل كريمة الطبخ

٢ م ك جبن بارميزان مبشور

ملح الكمية حسب الذوق

م ك زبادي

للزبدة البنية:

٥٠ جرام زبدة

---

الطريقه

نشوح البصل بزبدة و وزيت زيتون لمدة ٥ دقايق بعدين نضيف شرايح الثوم ونقلب إلى أن يبدا يشقر ونضيف قطع الزهره و نقلب على نار هاديه مره لمدة ٨ ل ١٠ دقايق

نضيف جوزة الطيب و فلفل أبيض و نقلب بعدها نضيف الحليب و الكريمة و جبنه البارميزان و نخليه يطبخ لمدة ٢٠ دقيقة

نطحن المقادير بالطاحونه اليدوية أو الطاحونه العادية بعدين تضيفون الزبادي و تضبطون الملح و تكملون طحن و ترجعونها القدر و تخلونه يغلي دقيقتين على نار هادية و بعد هذي الخطوه إذا تبون الشوربة صافيه يصير تصفونها بالصفايه

للزبدة البنيه: على مقلاه نذوب الزبدة على نار هاااديه لين يبدا تقلب حبات الحليب للبني الغامق والسائل لونه ذهبي و تحفظونه على جنب لوقت التقديم

وتجهزون النيوكي أو الخبز المحمص معاه وتصبون الزبدة البنيه على الوجه و بالعافيه