يسعد مساكم/صباحكم

عودة بعد إنقطاع طويل تقريبا سنتين! كانت فيها تجارب كثيره من زواجي للأمومه و جهد الحياة العملية اللي اعتبرها أصعب تجربه مرت علي! شكلي بأكتب تدوينه خاصة لهذي التجارب و افضفض فيها كل اللي بقلبي ههههه

مع كركبة الحياة كثير مبسوطة إني قدرت ألقى وقت و أرجع للتدوين أو للسوشال ميديا بكبره حقيقي ماكان عندي وقت نهائيا أو ممكن ماكان فيه طبق أو محتوى مميز ينزل على البلوق فقررت آخذ إجازة طويله أركز فيها على حياتي الشخصية لين صار الوقت المناسب اللي أرجع فيه على الساحة

نبدأ بوصفة خفيفة و لذيذه جدا و قريبه من ستايل المطاعم للي مشتاق للمطاعم وهي التاكيتوس عباره عن ميني تاكوز على شكل رولات صغار طول الإصبع مقلية و محشية بنفس الحشوات اللي تستخدم في التاكو يعني مايعتمد على حشوة أساسيه، أي حشوة للتاكو تفضلونها سواء لحم أو دجاج أو ربيان أو خضار كلها تضبط

و التاكيتوس يختلف عن الفلاوتا اللي هي تكون تاكو بنفس حجمه المعتاد و يلف رول و يقلى يعني الاختلاف بالحجم..

هالطبق موجود في التكس مكس كوزين (كوزين جنوب أمريكا الشماليه) و المكسيكي برضو يعتبر من أكل الشوارع في المكسيك غالبا يستخدمون حشوة بالخنزير..

أنا هنا اخترت حشوة بيكاديو اللي هي اللحم البقري المفروم مع البطاطس تقدرون تستخدمون نفس الحشوة للتاكو العادي إذا تفضلون حشوة اللحم المفروم في التاكوز، و قدمت معاه سالسا و صوص الرانش، وطلع شي مره رهيب امتزاج النكهات و الطعم مع بعض ، ممكن حشوات مثل لحم البريسكت المطبوخ عالبطيء بيطلع خرافي و مميز جربوا الطريقة

هنا

طبعا بالأساس استخدام خبر تورتيا الذره بس بالعاادة مو متوفر في السوبرماركتات المحلية يصير استخدموا توريتا طحين القمح مثل مااستخدمت في الوصفة ولا هو متوفر برضو تورتيا صغير الحجم أنا قطعتهم بالقالب ل٩ سم، يفضل مو أقل من هالحجم

ملاحظة:

التاكيتوس يكون مقلي بس بإمكانكم تستخدمون الأير فراير أو الفرن لتحميص الرولات، بس طبعا القلي ألذ

المقادير تكفي ل٤٠ رولز تاكو ممكن تسوون نص كمية اللحم و البطاطس أو تحفظونها بالفريزر مثل ماسويت، استخدمت ٦ شرايح خبز تورتيا حجم وسط طلع معاي ١٢ رولز، باقي الخبز المقطع لا ترمونه حمصوه و استخدموه في السلطات

٠٠٠٠

المقادير:

٦ حبات تورتيا مقطعه ل حجم ٩سم تقريبا

ربع كيلو جبنة موتزريلا مبشوره أو خليط مع التشدر تشيز

مقادير اللحم و البطاطس picadillo

بصل صغير الحجم أو نص حبة بصل متوسط الحجم مقطع مكعبات صغيره

٢ فص ثوم مهروس

نص م ص كمون حب

١ فلفل هالبينيو منزوع البذور و مفروم بالسكين، استخدموا أي نوع فلفل حار متوفر

حبة بطاطس صغيرة الحجم مقشرة و مقطعه مكعبات صغيره ربع إنش تقريبا

٤٠٠ جرام لحم مفروم بقري أو عجل

نص كوب طماطم مطحونه

م ك معجون طماطم

م ص بابريكا مدخنه

نص م ص كمون مطحون

ربع م ص قرفة

م ص فلفل حار بودره

م ص ملح

٣ عيدان بصل أخضر مقطع لقطع صغيره

تقريبا بمقدار ربع كوب كزبره مفرومه بالسكين

مقادير الرانش:

نص كوب مايونيز

ربع كوب ساور كريم أو زبادي الصافي

ملعقتين كبار لبن

م ص سكر

م ص خل

نص م ص ملح

مقدار م ك بقدونس مفروم بالسكين

مقادير السالسا:

١ حبة طماطم منزوع اللب و مقطع لمكعبات صغيره جدا

نص حبة بصل (يفضل أبيض) مفروم ناعم بالسكين

١ ليمون معصور

نص قرن فلفل منزوع البذور و مفروم بالسكين

نص م ص ملح

تقريبا م ك كزبره مفرومه بالسكين

٠٠٠٠

الطريقة:

أولا: طريقة البيكاديو

نحمس اللحم المفروم على نار عالية حتى يقلب للون البني بعدين نشيله من القدر و نخليه على جنب و نضيف ٢ م ك زيت زيتون و نحمص الكمون الحب بعدين نحط البصل المفروم و نقلب على نار هادية لين يذبل

نضيف الثوم المهروس و نقلب حتى يشقر و تطلع ريحته

نرجع اللحم المفروم و نضيف باقي البهارات مع الملح و معجون الطماطم و الطماطم المطحونه و الفلفل الحار ونقلب و نضيف البطاطس

نقلب و نخلي القدر و نغطيه على نار هاديه مره بدون أي سوائل لمدة ١٠ دقايق بعدين نضيف الكزبره و البصل الأخضر

ننقله لقالب أو تبروير للحفظ لين وقت الاستخدام

ثانيًا: التاكيتوس

نجهز خلط الطحين و الماء مثل مانسكر السمبوسة م ك طحين + ٢ م ك ماء

ناخذ نص ملعقة كبيره من مقدار البيكاديو مع جبن موتزاريلا ونحطه على طرف التورتيا و الطرف الثاني ندهنه بخليط الطحين و الماء

و نحاول نشد بقوة على الحشوة مع أول لفة حتى تتماسك

ونكمل لف الرول ونقفله و نتركه مفتوح من الطرفين بالمقابل نضغط الحشوة للداخل حتى لا تطلع وقت القلي

ونسخن الزيت على درجة حرارة ٣٤٠ – ٤٥٠ فهرنهايت و نقلي لحد تصير الرولات لونها ذهبي

و يتقدم دافي مع صوص الرانش و السالسا و بالعافية