مساء الخير

بعد تدوينة مرق الدجاج و اللحم على طول تحمست و نزلت هذا الطبق اللي يعتمد بشكل اساسي على مرق ممتاز، بس هل يضر لو ماعندي وقت اسوي مرق في البيت اني استبدله بموية حارة انا اشوف انه عادي بس النكهة بالمرق أغنى

المهم ان لا تستخدمون مرق مكعبات لأن راح تتركز نكهته و ملوحته بعد فترة طبخ  طويلة و عاد انا صار عندي مشكله مع  طعم المكعبات :/

و ماكنت اتخيل اني راح اوصل لطبق موزات مسلوقة بهذي اللذاذة صراحة لأن دايم اسوي موزات مسلوقة بس مااحس اني انتجت شي مميز و من وجهة نظري ان لحم الغنم لازم يتعزز ببهارات و منكهات

بالإضافة إلى طبخ بطيء اللي هو اكبر عامل للحصول على لحم طري و يذوب بالفم

تدوينة المرق هنا

—

المقادير

٢ موزات غنم او حسب حجمها اذا اصغر نزيد إلى ٤ حبات احيانا

حبتين طماطم كبيرة الحجم فرش او واحد معلب مقطعة مكعبات صغيرة

١ بصل متوسط الحجم مفروم ناعم

٢ فص ثوم

١ غصن من اكليل الجبل

ثلثي كوب حمص ناشف منقوع بموية ليلة كاملة

م ك معجون طماطم

٧٠٠ مل مرق دجاج

البهارات

م ص كركم

م ص ونص كمون

ملح و فلفل اسود

——————————

نتبل الموزات بنص كمية البهارات و نرش الملح على كل جهة و نحمرهم بنفس القدر اللي راح نطبخ فيه، واهم شي يكون القدر مناسب تماما لكمية المقادير عشان لا نزيد مرق اكثر و تطلع النكهة خفيفة

على نفس القدر نشوح البصل لين يذبل و نضيف الثوم و باقي البهارت  والفلفل الأسود و نقلب دقايق و بعدين معجون الطماطم و نقلبه لين نتخلص من الدهن الزايد اللي فيه و نحط الطماطم و نخليه يتسبك على نار هادية لمدة ٥ دقايق

نرجع الموزات للقدر ونقلب مع البهارات لمدة دقيقة تقريبا

و نصب المرق و آخر شي نحط الحمص المنقوع و اكليل الجبل ونتركه يطبخ على نار هادية جدا لمدة ساعة ونص إلي ساعتين 

او تنتظرون عليه لين يغلي و تدخلونه الفرن على درجة حرارة ١٨٠ إلي ٢٠٠ لمدة ساعتين إلى ٣ ساعات او الين يتقطع اللحم معاكم بالشوكة بسهولة

و تقدمونه مع رز او خبز و بالعافية