مساء الخير

و اخيرا شديت حيلي و سويت لكم حلا ، عاد قعدت اشوف قبل يومين متى آخر مرا نزلت وصفة حلا طلع من رمضان !!! اوووف مرا بعيد، فقلت ارجع لكم بشي لذيذ و سهل، حطوا مليون خط تحت سهل ههههههههه انا بالي مو طويل في الحلويات، ممكن بين كل فترة و فترة اسوي شي و ماعاد ارجع اسويه عادي!! بس من باب الفضول او التجربة او شي ودي اقدمه لكم على المدونه

الشارلوت حلا يجي منه نوعين..دافي و بارد..و ابتكر في عهد الملكة شارلوت زوجة الملك جورج الثالث الانجليزي..و سمي الحلا باسمها..

شارلوت البارد يكون عباره  عن الليدي فينقرز (نفس البسكوت الاسفنجي المستخدم في التيراميسو) منقوع بأي سائل منكّه مثلا قهوة..و يصف بشكل طولي داخل قالب و يحشي القالب بأي خلطة قوامها كريمي..موس الشوكولاته او الفانيلا او االفراوله او القهوة او كريم شانتيه و يدخل الثلاجة و يقدم بارد..وهذا النواع غالبا موجود في محلات الحلويات اذكر مرا اكلت منه..بس انتبهوا دايم برا ينقعون البسكوت بكحول..

النوع الدافي اسهل و ألذ بنظري..عبارة عن اي فاكهة مطبوخة و مهروسه..تحشى داخل قالب مغطى بشرايح خبز مدهونه بالزبده و ندخلها الفرن لين يتحمص الخبز..و يقدم مع صوص فانيلا ! امممم متخيلين الطعم كيف..لذيييييذ

فيه نقطة ابي اوضحها..بالنسبة لترتيب الخبز انا غيرته لكم لشي اسهل..بالعادة يقطع الخبز بشكل طولي و يغطون القالب من جوا على شكل اعمدة مصفوفه جنب بعض..حسيت هالطريقة حوسه شوي و مرا تاااخذ وقت..فغيرت لكم للأسهل و ان شاء الله تعجبكم

الطريقة تكفي لثلاث أشخاص..ضاعفوا الكميه في حالة لو زاد العدد

………………………………………….

المقادير:

تفاحتين مقشرة و منزوعة البذور و مقطعة لمكعبات صغيرة

ثلثي كوب سكر بني

50 جرام سكربني الفاتح

م ص قرفة

6 شرايح توست ابيض

50 جرام زبده مذوبة

صوص الفانيلا:

200 جرام حليب سائل بدرجة حرارة الغرفة

100 جرام كريمة خفق بدرجة حرارة الغرفة

نص م ص فانيلا مطحونه او ١ عود فانيلا 

1 صفار بيض

3 ملاعق كبيره سكر بودره – Icing sugar

———————————-

نشغل الفرن على درجة حرار 200 سيليزيوس

نذوب الزبدة في المقلاه و نضيف السكر البني و نقلب لين تحسون السكر تجانس مع الزبدة

بعدين نضيف قطع التفاح و القرفه  و نقلب 

و نترك التفاح على نار هادية من 6 ل 10 لين تذبل  

بالنسبة لشرايح الخبز 3 راح نقطعها حسب شكل قاعدة القالب اللي بنستخدمه..و  النص الثاني نقطعهم شرايح طوليه بعرض إنش تقريبا

بقايا الخبز لا ترمونه! سووا منه فتات خبز فيه ألف طريقه و طريقه على قوقل

تضغطون ضغطه خفيفة على شرايح الخبز و ندهنها بالزبده على كل الجانبين و تغلفون القالب مثل ما انا مسويه

تحطون التفاح اللي طبخناه و ندخله الفرن لمدة ٣٠ دقيقه..

صوص الفانيلا

الفانيلا المطحونه اللي اقصدها نفسها موجوده في محلات ابازير بجده

لو ماعندكم ابازير استخدموا عود الفانيلا قصوه من النص و شيلوا البذور بالسكين و حطوه على خليط الحليب و الكريمه مع العود نفسه

نسخن الحليب و الكريمة لين يطلع زي البخار بس لا يغلي..و خلال هذي الفتره نخلط (بالخفاقة اليدويه او الكهربائيه) صفار البيض مع السكر لين نوصل لقوام غليظ

نشيل عود الفانيلا من الحليب و نصب شوي شوي على خليط البيض و السكر و نخفق بنفس الوقت..و نرجع الخليط كله على النار و على اوطى حرارة نقلب الصوص بشكل مستمر لمدة 10 دقايق تقريباا

ملاحظة: الصوص ماراح يكون غليظ مرا و انا قاصدة اني اخليه كذا! لو تحبون قوام اكثف او اغلظ ضاعفوا كمية صفار البيض و السكر.لأن الصفار من العوامل المساعدة على كثافة الصوصات

نصفي الصوص ونخليه على جنب لين يصير دافي..

نطلع القوالب من الفرن و نقلبها على صحن التقديم..و ممكن تقدم حاره او دافيه مع الصوص

و بالعافيه