المقادير:

2 ستيك – و انا استخدمت قطعة ريب آي ستيك

كوب مشروم مقطع شرايح

1 بصل متوسط الحجم مقطع جوانح رفيعة

1 علبة طماطم مع عصيرها مفروم بالسكين

فص ثوم مهروس

م ص اوريغانو

ملح و فلفل اسود

خبز باغيت او اي نوع خبز – مقطع بالطول ومحمص 

جبنة بارميزان مبشوره – الكمية حسب عدد شرايح الخبز اللي طلعت معاكم

—————————————-

طبق مثل هذا مقاديره قليلة راح نستخدم تكنيك سهل يعزز الطعم.. انا استخدمت ريب آي ستيك لأن ابي نكهة الشحم الطالع و العصارة اكمل فيها باقي طبخ المقادير..

انا راح اشرح طريقة طبخ الستيك بالكلام فقط بس اللي يبي التفاصيل في موضوع الستيك يدخل على الدرس الخاص فيه 

هنا

اول شي لازم يكون الستيك بدرجة حرارة الغرفة و نرش الملح من كل الجهتين..اذا بنستخدم ريب آي ستيك يتخلله شحم كثير يعني ماراح نكثر دهن …تقريبا 3 ملاعق كبيرة حسب حجم المقلا طبعا

ونخلي النار بين الوسط و العالي لين يدخن الزيت..و نحط الستيك ونقلبه كل 20 ثانية يعني بالدقيقة 3 مرات لحد ماتوصلون لدرجة الاستواء اللي تبونها..

بما إن أغلبكم يحب الوسط اوالاستواء الكامل! اذا كان الستيك ارتفاعه انش اطبخوه لمدة 3 دقايق إلى 4 دقايق..

نخلي الستيك يرتاح ونكمل طبخ الصوص..

على نفس المقلا نقلل من كمية العصارة و الدهن الطالعة من الستيك و نضيف شوي زيت زيتون ونطبخ البصل على نار متوسطة لين يذبل

نضيف الثوم و المشروم و نطبخ لين يذبل المشروم  وتنشف رطوبته بعدين نضيف الطماطم و نحك في المقلا عشان تطلع نكهة الستيك

ونضيف الاوريغانو ونخليه يتسبك لمدة 5 دقايق..

نقطع الستيك شرايح نحيفة ونضيفة على الصوص وآخر شي الملح و الفلفل الأسود

بعد ماحمصنا الخبز نحط خلطة الستيك ونرش البارميزان..

و بالعافية