مساء الخير

التاكووو اللذيذ اللي يجي بكذا شكل سمك دجاج لحم او ربيان بس على كثر اشكاله مااحب إلا الربيان و اللحم بس..قد سويته مرا باللحم روووعه في حالة لو طبخنا قطعة اللحم كويس من غير ماننشفها و اخترنا تتبيلة تناسبه صدقوني بيطلع شي خيال وانا اخترت الربيان على البلوق لأن الجو حار و مو وقت شوي ! هو صحيح مو لازم شوي بس طريقتي اللي بنزلها ألذ بكثير من لو طبختوا اللحم بطريقة غير الشوي

بس ان شاء الله بعد الصيف بنزل طريقة تاكو اللحم 

في الوصفة انا اضفت مع الربيان الكول سلو و سالسا الذرة حاولوا تطبقون الوصفة كاملة عشان يكمل الطعم و يتجانس مع بعض

المقادير:

نص كيلو ربيان حجم وسط..مقشر و منظف

نص بصل ابيض مفروم ناعم

فص ثوم

علبة طماطم مقشرة مع عصير مفرومة بالسكين

م ص كمون

م ص كزبرة ناشفة مطحونة

نص م ص فلفل كايين بودرة او أي فلفل احمر بودرة

م ص سكر 

مقادير سالسا الذرة

علبة ذرة صغيره حجم 185 جرام

نص حبة فلفل رومي أحمر مقطع مربعات صغيره

نص م ك عصير ليمون

رشة كمون و كزبرة

نص م ص فلفل احمر بودرة

ملح و فلفل أسود

مقادير الكول سلو

كوبين كرنب أحمر او ابيض مقطع شرايح نحيفة

ثلث كوب لبن 

1 م ك مايونيز

م ص ماسترد

نص م ص خل تفاح

نص م ص سكر

ملح و فلفل أسود

——————————————

بالبداية  يفضل و تجهزون السالسا و الكول سلو قبل ماتطبخون الربيان

في الكول سلو يخلط اللبن مع باقي المقادير لين يتكون عندنا صوص و نصبه على الكرنب

و السالسا نفس الشي نخلط المقادير مع بعض و نحفظهم كلهم في الثلاجة لين نخلص الربيان

على المقلاة نحمس البصل مع 2 م ك زيت زيتون لحد مايصير لونه ذهبي

نضيف الثوم المهروس و الكمون و الكزبره نقلب لمدة دقيقة تقريبا بعدين نضيف الطماطم و السكر و الفلفل البودرة و حتى العصير اللي داخل علبة الطماطم ضيفوها و نقلب و نترك الطماطم يتسبك على نار هاديه بين 6 ل 10 دقايق تقريبا بالكثير 

نضيف الربيان و نقلب مع خلطة الطماطم و نخلي الربيان يطبخ 5 دقايق بسس لو كان حجم الربيان وسط وآخر شي الملح

واستنوا على الربيان يدفى شوي قبل ماتسوون التاكو

و بالعافية

ملاحظة:

تقدرون تسوون السالسا و الكول سلو قبلها بكم يوم و تحفظونها بالثلاجة