مرحبا 

اطباق الكاري من اسهل الاطباق و متنوعة بشكل لا محدود و احلا شي فيها اننا نمشي على نمط طريقة معينة ونقدر نغير في المقادير

ايش تعني اطباق الكاري؟ هي عبارة عن بهار الكاري مخلوط في صوص بغض النظر عن باقي المقادير اللي طبخناها فيه

كاري الدجاج ولا لحم ولا سمك ولا اي شي تقريبا كلها تشبه بعض مع اختلاف بسييييط  بينهم بس في النهاية الشكل واحد و اللي هو المقدار الأساسي مع صوص الكاري

الطريقة هذي حبيت ادخل معاها شتني الكزبرة و النعناع خلطة لذيييييييييييذة وجودها يخفف من حرارة الكاري..الطبق مو سبايسي بس معروف ان الكاري فيه حرارة خفيفة ومع الشتني بيطلع احلا و احلا

المقادير:

مقادير كاري البطاطس و الزهره

1 راس زهره متوسطه الحجم مقطع صغار

حبتين بطاطس متوسطة الحجم مقطعة مكعبات طول ربع اصباع تقريبا

نص بصل كبير مفروم ناعم 

فصين ثوم مهروس

م ص زنجبيل رطب مبشور

م ك معجون طماطم

علبة و نص طماطم مقشرة مع عصيرها افرموها فرم ناعم

علبة حجم 370 حمص مسلوق

2 م ص ونص  بهار كاري

وصفة بهار الكاري هنا

1 م ص ونص  بهار جارام ماسالا

وصفة الجارام ماسالا هنا

100 حليب جوز الهند – استبدلوه بكريمة لو ماتفضلون حليب جوز الهند

4 ورقات كاري طازجة افركوها باليد شوي يعني تكون شبه مقطعة عشان تعطي نكهة اقوى

مقادير شتني الكزبره و النعناع

كوب و نص كزبره خضرا

ثلث كوب نعناع

2 م ك زبادي

م ص كمون

م ص ليمون

رشة ملح و سكر

مقادير الخبز

كوب + ملعقة كبيرة دقيق بر

م ك ونص سمسم

رشة ملح

م ك سمن مذوب 

ثلاث أرباع كوب موية بدرجة حرارة الغرفة

ضاعفوا المقادير لو حابين كمية اكبر

—————————————————————

ممكن تسوون الشتني قبلها بيوم نحط جميع المقادير في الخلاط و نخلط لحد مايصير عندنا خليط اخضر متجانس قوامه ثقيل شوي..و نحفظه في الثلاجة لوقت الاستخدام

———-

طريقة الكاري

نحمس البصل  على نار هادية في ربع كوب زيت او ازود شوي لحد ماايتكرمل يصير على ذهبي راح ياخذ وقت ..بعدين نضيف البطاطس و نقلب لمدة دقيقتين مع البصل و نضيف الثوم و الزنجبيل و معجون الطماطم وبعده نضيف حبات الزهره

حاولوا تقلبون بشويش مع الزهره  عشان يتجانس ومايتفتت وبعدين نضيف الطماطم  و عصير الطماطم اللي بالعلبة و البهارات و الحمص  واوراق الكاري

و نخلي المقادير تتسبك شوي و آخر شي نصب موية كوب ونص تقريبا لو حسيتوا تحتاجون زيادة ضيفوا بس لا تكثرون تصير كأنها شوربة  

و نغطي المقادير و نتركها تطبخ من 10 دقايق ل 15 دقيقة لين الخضروات تستوي وآخر شي نضيف حليب جوز الهند و نقلب و نتركه لمدة 5 دقايق لين الصوص يثقل شوي

———–

طريقة الخبز

نقلب جميع المقادير الجافة مع بعض

و نضيف الموية  والسمن ونعجن باليد و نتركها ترتاح لمدة 20 دقيقة ..بعدين نكورها كور متوسطة ونفردها و نخبزها على الصاج من غير دهن ولا شي ماراح تاخذ وقت لكل خبز اقل من دقيقة لو كان الصاج حار

————–

و بالعافية