مرحبا

الكاري العجيب اللي موجود تقريبا في كل مطبخ من دول جنوب آسيا مثل جنوب الهند و اندونيسيا و تايلاند و سريلانكا حتى بنجلاديش لهم كاري خاص فيهم

 كلمة كاري تعني خليط بهارات مختلفة ماتتبع مطبخ دولة معينة مثلا الهند بس ولكن لكل دولة من اللي ذكرتهم لها كاري خاص فيها يميزها عن غيرها 

لو نشوف الكاري التايلاندي  نوعين أحمر و أخضر عبارة عن معجون من بهار و اعشاب دايم نشتريه جاهز لأن بعض المقادير الأساسية مو متوفرة

و بالنسبة للكاري اللي ينسب للأطباق الهندية تختلف مقادير البهارات من منطقة لمنطقة من 3 انواع من البهارات لين 20 نوع  واحيانا يجي اصفررر مرا من كثر الكركم واحيانا لون اصفر عادي ..انا مرا جتني هدية من الهند خلطة بهارات كاري لونها اصفر فاقع هههههه كانت كويسة بس حارة بزيادة  

و لو تقرأون في الكتب اللي تخص المطبخ الهندي نادرا تلقون وصفة صريحة لبهار الكاري لأن هي من الأشياء اللي ابتكرت عن طريق الإنجليز مثل التشيكن ماسالا يعني مو وصفة هندية اصلية

المقادير اللي بكتبها تقدرون تضاعفونها لو استخدامكم للكاري كثير انا سويت على قدي لأن مو دايم استخدم الكاري

و طبعا عشان يطلع البهار يبان فيه الطعم صح ضيفوا اوراق الكاري للمقادير..أنا شخصيا ماضفت ! احب اضيف اوراق الكاري مع مقادير الطبخة اللي بسويها مو مع البهار

لو ماتبغون طريقتي ضيفوا مع مقادير البهارات 5 اوراق كاري

استخدموا الملاعق المعيارية

المقادير:

4 حبات فلفل حار ناشف – شيلوا الحبوب منها

4 م ك كزبرة ناشفة

2 م ك كمون

1 م ص حبوب الحلبة

1 م ص حبوب خردل اللي لونها اسود – تلقونها في قسم البهارات بالكيلو في السوبر ماركت

1 م ص فلفل اسود حب

ثلاث ارباع م ك كركم بودرة

نص م ص زنجبيل بودرة

————————————–

نخلط كل البهارات مع بعض و نحمصها على نار هادية لين تشمون ريحة البهار

بعدين اطحنوه وبعدين انخلوه عشان يطلع لكم بهار ناعم اذا كانت الكمية مثل حقتي ماغيرتوها احفظوها في الدولاب في مكان جاف او اذا ضاعفتوا احفظوا نص في الفريزر و نص بالمطبخ.