مرحبا

احس اني من زمان عن الوصفات هههههه من بعد درس اللحوم اللي اخذ من وقتي كثير عشان اكتبه اخذت لي اجازه من التدوين  

ساندويتش الدجاج و صوص الباربكيو بالرغم من سهولته إلا إنه دقيق بتناسق النكهات مع بعض

انا جربت مليوون وصفة بس مااحس لقيت الطعم اللي أبيه لين قررت مرا اسوي الطريقة اللي براسي واخيرا وصلتله ههههههههههه

انا هنا استخدمت سيقان الدجاج  فقط لو بحثتوا في قوقل راح تلقون وصفات كثير مستخدمين الصدور 

 بس لما يكون الساندويتش جوسي مليان عصارة بالاضافة للصوص وش تتوقعون بيطلع؟ اكيد خرافي عشان كذا السيقان افضل من الصدور

صوص الباربكيو مو كامل اقصد اني وزعت المقادير بين الدجاج و الصوص بس اللي يبي طريقة الصوص لحاله من عيوني 

و الكول سلو تقدرون تستخدمونه كسلطة من غير الدجاج

المقادير:

1000 جرام سيقان دجاج كاملة

نص بصل متوسط الحجم مفروم ناعم

1 فص ثوم مهروس

م ص كمون

نص م ص بابريكا

نص م ص فلفل احمر بودرة ( كايين) لو مافيه مو مشكلة

نص م ص بودرة البصل

م ك معجون طماطم

ملح  و الكمية حسب الذوق

مقادير صوص الباربكيو:

ثلاث ارباع كوب كاتشب

ربع كوب خل تفاح

نص كوب ورسيتشير صوص

م ك سكر بني غامق

نص م ك خردل بودره

انا عندي الحبوب و طحنتها بس لو مو متوفر عادي

مقادير الكول سلو:

كوب كرنب احمر و اخضر مقطعين شرايح نحيفة

نص جزر مبشور

ثلث كوب لبن

م ك و نص مايونيز

نص م ص ديجون ماسترد

نص م ص خل تفاح

م ص سكر

نص م ص فلفل اسود

————————————————

نحمس البصل على نار واطية مرا بشوي زيت نباتي.. بس اهم شي هنا البصل لازم يذبل ويقلب على اللون الذهبي يعني ممكن ياخذ تحميس البصل من5 ل 8 دقايق 

بعدين نضيف الدجاج و البهارات  ومعجون الطماطم و نرفع النار شوي للوسط و نقلب الدجاج مع البهارات لمدة دقيقتين تقريبا

و نضيف مويه حارة لحد مايغطي سطح الدجاج و نوطي النار مررا ونخليه تقريبا من 35 ل 45 دقيقة او إلين يستوي 

في هذي الفترة نسوي صوص الباربكيو نخلط كل المكونات مع بعض ونخليه على جنب

تقدرون تسوون الصوص من الليل و تخلونه بالثلاجة ..الصوص ينحفظ يومين بالثلاجة

و نسوي سلطة الكول سلو واحفظوها بالثلاجة

بعد مايستوي  الدجاج ننزع الجلد و العظم منه وقطعوا اللحم بشوكتين لين يتنتش او مدري وش هي الكلمة هههههههههههه

يعني يصير زي كذا 😛

على نفس القدر فيه باقي من عصارة الدجاج نشيل ثلاث ارباعه ونخلي الربع في القدر وضيفوا عليه الدجاج وصوص الباربكيو اللي سويناه

وعلى نار واطية مرا لين يتشبع الدجاج بالصوص تقريبا لمدة 10 دقايق

و بعد مايتركز الصوص نضيف شوي ملح حسب ذوقكم

تقدرون تستخدمون اي خبز مو لازم خبز البرجر..

و حطوا فوق الدجاج الكول سلو

ملاحظة: 

صوص الباربكيو يتميز بنكهة حادة شوي تقدرون ماتضيفون الصوص كله يعني ثلاث ارباع او حسب المستوى اللي يعجبكم 

و بالعافية