تقبّل الله صيامكم و مبارك عليكم الشهر وكل عام انتم بخير

في كيكة  التمر دايم المشكلة اللي تواجهنا جفاف القوام كأنه خبز بسبب طبيعة التمر نفسه، حاولت في هذي الكيكة اني اخليها قريب للطراوة بالاضافة لصوص الكراميل، و اللي مايحب الحلا الزايد راح تعجبه الكيكة من غير صوص، 

يمكن اضافة جوز او جوز الهند مع خليط الكيك، الخيارات و الاضافات  وانواع البهارات مفتوحة لكم من غير تغيير في المقادير الاساسيه حتى تضبط معكم

المقادير:

١٥٠ جرام زبدة بدرجة حرارة الغرفة

١٦٥ جرام سكر بني

١٦٥ جرام سكر ابيض

٣ بيضات بدرجة حرارة الغرفة

ثلثي كوب تمر معبوط مذوب بنص كوب ماء حار

٣٠٠ جرام دقيق

٢ م ص بيكنج صودا

نص م ص ملح

١٨٥ لبن بدرجة حرارة الغرفة

صوص الكراميل:

كوب سكر بني

٢٠ جرام زبدة

نص م ص عسل

كوب كريمة خفق

—

نشغل الفرن على درجة حرارة ١٨٠ سيلزيوس

الصينية المستخدمه ١٣ إنش في ٩ إنش و كمية الخليط كبيره يمكن تقسمونها على صينيتين او تختارون صينية كبيره متوفرة عندكم بأي شكل

نجزأ التمر المعبوط لقطع صغار و نصب عليهم الماء الحار و نحرك بالشوكه لين يذوب ويصير خليط رطب مثل المعجون

ونوزن هذا الخليط ل ١٦٥ جرام لأن من نوع لنوع يختلف في الكمية احتمال يزيد معاكم خليط التمر في الكيك

نخلط المقادير الجافة مع بعض و نخليها على جنب

نخلط الزبدة مع نوعين السكر لمدة من ٣ ل ٥ دقايق لين يتكثف و يفتح لونه

نضيف البيض على دفعات و نحط التمر المعبوط بعد مانخلص من إضافة البيض 

نضيف الدقيق على ٣ دفعات و يتخللهم اللبن على دفعتين المهم نبدا بدقيق و ننتهي بدقيق

و ندخله الفرن لمدة ٢٠ دقيقة حسب حرارة فرنكم، و تشيكون بعود خشبي 

متى تكون إضافة الصوص؟

بإمكانكم تجهزون الكراميل من بدري و تصبونه على الكيكة وهي حاره او العكس الصوص حار و الكيكة بارده بس لأني احذر من التعامل مع الكراميل وهو ساخن افضّل الطريقة الأولى

نحط السكر البني و الزبدة و العسل  في قدر ونقلب بشكل خفيف لين تذوب الزبدة و يتجانس مع السكر لمدة ٥ دقايق على نار هادية، بعدين نضيف كريمة الخفق و نقلب بشكل سريع بالخفاقة اليدوية و نخليه ثواني على النار و نشيله لين يدفى و نصبه على الكيكة

و طبعًا التزيين حسب ذوقكم من مكسرات و جوز الهند و الورد المجفف

بالعافية