مساء الخير

و هذا اول بوست في السنة الجديدة والله يجعلها سنة خير علينا يارب

و حبيت ابدأ بطبق سهل وبسيط..هو طبق فرنسي الأصل اسمه 

aumônière

أومونييغ اساسا يسوونه من عجينة الشورت كرست بالمشمش وهي تعني اننا نشكل العجينة على شكل شنطة النقود القديمة 

بس فيه الخيار الثاني على نفس النمط و يكون بالكريب او البانكيك..

و انا ليش مامشيت حسب الطبق التقليدي لأن ابي انزل وصفة للكريب مرا رهيبة وكنت ابي البريزينتيشن مميز شوي يجذبكم هههههههه

بالنسبة لو نبي نطبق الكريب  على شكل الأومونييغ مهم مهم يكون سمْك الكريب نحيف و رقيق عشان اللف..ولو عندكم جهاز الكريب احسن واحسن

عموما الكريب مو زي البانكيك.. يحتاج تكنيك خاص وجهاز خاص..و الجهاز يساعدكم عن طريق الخشبة ان يكون الكريب كله متساوي في السمْك و خفيف و درجة الحرارة ثابتة ماترتفع

و الجهاز اتوقع موجود في محلات السيف اذا ماكنت غلطانه

ووصفة الكريب هذي تصلح مالح و حلو في حالة لو تبونه لطبق مالح لا تضيفون سكر يعني لو عندكم حفلة او اجتماع عائلي وتبغون تقدمون كريب مالح و حلو سووا خلطتين افضل

كومبوت الفروالة

معنى كلمة كومبوت؟ عبارة عن طبخ الفواكه سواء طازجة او مجففة بالسيرب (قطر) تقريبا مثل المربى بس بطريقة اسرع لحد ماتلين ويمكن اضافة بهارات او منكهات حسب نوع الفاكهة..واحلا شي جربته في الكومبوت هو كومبوت التين المجفف..مرا مرا لذيذ استخدمه مع جبنة بلو تشيز على شكل ساندويتش..الخيارات كثير في الكومبوت ابحثوا عنها في قوقل لو حابين تسوون بنوع فاكهة معين

بالنسبة لصوص الشوكولاته…مهم مهم مهم نوع الشوكولاته لو ماكان متوفر نوع ممتاز استخدموا نوتيلا وخلاص هههههههه

لأن صدق لو كان النوع رديء ابدا ماراح تحبون طعم الصوص..طبعا الأفضل دائما ماركة فالرونا هي صحيح غالية شوي بس الطعم يستاهل

——————————-

المقادير:

250 جرام دقيق تقريبا من كوبين ل كوبين وربع

3 بيضات بدرجة حرارة الغرفة

325 مل حليب بدرجة حرارة الغرفة

125 مل مويه

20 زبدة مذوبه

م ك زيت

ملعقة كبيرة ونص سكر ابيض ناعم الحبيبات

م ص فانيلا سائلة 

رشة ملح

مقادير كومبوت الفروالة

10 حبات فروالة كبيرة الحجم مقطعة شرائح

600 مل مويه

350 جرام سكر

صوص الشوكولاته 

100 جرام شوكولاته فيرونا 70 بالمية

100 مل حليب

20 جرام زبدة

3 م ك سكر ابيض ناعم الحبيبات

——————————————-

نبدا بالكريب نخلط المواد السائلة مع بعض و الجافة في صحن

نصب الخليط السائل بشويش و نخلص بالخفاقة اليدوية لحد ماتتجانس المقادير لا تبالغون بالخلط ونغطيه ونتركه لمدة ساعتين

بعد الساعتين نصفي الخليط ونضيف 100 مل موية زيادة او حليب و نخلط ..

انا استخدمت مقلاه غير قابلة للالتصاق قطرها 15 سم تقريبا وتكون النار بين الوسط و الواطي و في الدهن استخدمت بخاخ الزبده افضل و اسرع

لما تصبون الكريب حاولوا تحركون المقلا بشكل دائري وسريع وبالعادة ماياخذ وقت في الطبخ دقيقة او دقيقتين على كل جهة بس تاخذ لو ن ذهبي خفيف 

بعد مانخلص من الكريب نسوي الكومبوت..

نغلي الموية مع السكر لحد مايذوب السكر ويتكون عندنا قطر او سيرب

ونصبه على الفراوله و نتركه لحد مايبرد

صوص الشوكولاته

نذوب الشوكولاته بالحليب على نار واطيه بعدين نضيف الزبدة و السكر نقلب لين يصير صوص ثقيل شوي

و نغطيه لوقت الاستخدام…

بعد ماتبرد الفراولة ناخذ بمقدار ملعقة كبيره من غير السيرب ونحطها في وسط الكريب ولما نجي نقفل الكريب ناخذ كل جزء نرفعه ونثنيه على شكل منحنيات جنب  بعض لحد ماتسكر كلها ونجيب عود خشبي صغير وندخله في وسط المنحنيات..يارب فهمتوا الطريقة ههههههه

و في النهاية استخدموا حبتين كريب قطعوها شرايح طويله و اربطوا فيها الكريب المحشي مع العود كعامل مساعد عشان ماينفتح نفس ماانا مسويه في الصورة

لو كان الكريب سميك راح يتعبكم حاولوا قد ماتقدرون يكون خفيف شوي

و طبعا صوص الشوكولاته لا تنسونه و بالعافية