عيدكم مبارك كل عام وأنتم بخير

سبق و نزلت تكنيك عن شوي فخذ الغنم بس بطريقة مختلفة في حال لو كان ماتنظف من الشحم مية بالمية

الطريقة بالتدوينه هنا

من وجهة نظري ألذ قطعة في الغنم لو انطبخت بطريقة ممتازه هي الفخذ أهم شي طريقة الطبخ مو البهارات ولا أي إضافات ثانيه هذي كلها اختياريه وحسب الذوق

هنا استخدمت تتبيلة الشاورما لأن دائما مقاديرها تحتوي على عناصر تليّن و تطري اللحم و بنفس المقادير تقدرون تغيرون قطعة الفخذ وتطبقونها على شرايح توب سايد عجل لو بتسوون الشاورما التقليديه

وكمية المقادير والوقت تعتمد اعتماد كلي على وزن الفخذ كل مازاد كل مااحتاج وقت أطول في الطبخ

و الملح ملعقة ونص لكل كيلو لو كان عندنا ٢ كيلو فخذ تصير كمية الملح ٣ ملاعق صغيره

هذي الوصفة لذيييذه جدا لو بتغيرون لطريقة تقديم غير مألوفه مثل ماسويت شاورما بلاتر بتكون إضافة مميزه لسفرتكم بالعيد

---

كمية المقادير لوزن ٢ كيلو

المقادير

٢ كيلو إلا ربع فخذ غنم نعيمي

التتبيلة

بصل أحمر متوسط الحجم مبشور + الاحتفاظ بمويته

٢٥٠ مل شراب العنب الأحمر من شركة راوخ

١ برتقال معصور

٣ ملاعق صغيره ملح

م ص ونص سبع بهارات

م ص فلفل أسود مطحون

١٠٠ مل زيت نباتي

مقادير جليز دبس الرمان – التغطية

٢ م ك دبس رمان

٥٠ مل زيت نباتي

م ص ملح

نص م ص سبع بهارات

---

نبشر البصل و نحتفظ بمويته و نخلطه مع باقي البهارات مره كويس لين يذوب الملح

نشق بالسكين مثل الخطوط على سطح الفخذ

نصب التتبيله و نقلب الوجه المشقوق للأسفل لقاعدة الصينية بيحث يتشرب الجزء الأكبر منها و ناخذ من التتبيله ونسقي للجزء الأعلى كمان

نغطيها بنايلون و ندخلها الثلاجة لمدة لا تقل عن ٨ ساعات أنا تبلتها لمدة ١٢ ساعة

نطلع اللحم من الثلاجة قبل الطبخ ب ٣٠ دقيقة نجففه بشكل خفيف من التتبيله و مهم نستخدم صينيه بداخلها شبك لأن مانبغى اللحم يلمس القاعدة

نشغل الفرن على درجة حراره ٢٠٠ مئوية أو بالغاز على أوطى حرارة الين يسخن الفرن

و نغطي الصينية بالقصدير على مرتين واكتموه مره كويس و دخلوه الفرن لمدة ٤٠ دقيقة

بعد ٤٠ دقيقة طلعوا الصينية من الفرن و افتحوا القصدير و صبوا ٢٥٠ مل ماء حار

ونرجع نقفله ونكتمه وندخله الفرن لساعة ونص إلى ساعتين وممكن أكثر يعتمد على حرارة فرنكم و اختبروا بالشوكة إذا طلع اللحم بسهولة معناته استوى راح توصل لمرحله يطلع العظم منه

بعد الاستواء نخلط مقادير جليز دبس الرمان و ندهن اللحم من كل الجهات و نحمره من أعلى و راقبوه في هذه الخطوه حتى لا يحرق دبس الرمان

و بعد الفرن اتركوا اللحم يرتاح لمدة ربع ساعة قبل التقديم و بالعافية