مساء الخير

مع بداية اي موسم لخضار معين او فواكه احاول استغلها بوصفات حافظتها من زمان عندي، ولو ان بعض الخضار متوفرة طول السنة بس لما يجي موسمها او الجو المناسب لها يكون طعمها غير

الحين موسم الشمندر و المعروف عن الشمندر بفوايده وقلة وصفاته عندنا، يعني جد نادرا مانشوف احد يتحمس له او يمكن نقول قلة الأفكار في طبخه يمكن هي اللي تخلينا ننساه احيانا

بقول لكم على سلطة لذيذة دايم اسويها..اقطع الشمندر لأنصاص بقشره و ارش عليه زيت زيتون و خل واشويه بالفرن لمدة ٤٥ دقيقة او لحد ماتلين و يصير سهل دخلة السكين فيها..اقطعها مكعبات صغيرة او كبيرة حسب ماتحبون 

واسوي فينيغريت المسترد..٤ ملاعق كبيرة زيت زيتون +١ م ك خل+ ٢ م ص مسترد+ م ص اوريغانو ناشف + رشة ملح..اخلط كل المقاديرمع بعض ماعدا زيت الزيتون ،احطهم في طاحونه او خلاط و اصب الزيت شوي شوي لين يتكون عندي مستحلب واصبهم على الشمندر، 

واضيف برضو جبنة ماعز و خبز محمص في السلطة جربوها و بتعجبكم ان شاء الله 😛

شفيني شطحت عن الموضوع :\ ماعلينا

الشوربة برضو لذيذة على الرغم من لونها الشاذ بس تغيير عن المعتاد و مفيدة بنفس الوقت

ملاحظة:

في الوصفة طريقة عمل مرق الدجاج الأبيض للشوربات استخدموها لكل شوربات الدنيا اللي بيستغني عن الماجي

———

المقادير

كوب وثلث شمندر مقطع مكعبات

١ بصل متوسط الحجم مقطع مكعبات صغيرة

نص م ص زعتر ناشف او ٣ سيقان من الزعتر الفرش

م ك خل تفاح او ٢ م ك عصير ليمون

م ك سكر ابيض

من ملعقتين ل ٣ ملاعق كبيرة سور كريم – تكون بدرجة حرارة الغرفة

مقادير المرق:

١ دجاج حجم ١٠٠٠ جرام منزوع اللحم و مجزأة  ل ٥ اجزاء

لتر ونص إلى لترين مويه بدرجة حرارة الغرفة

١ بصل مقطع جوانح كبير

١ عود كرفس

بوكيه اعشاب (بقدونس+ورق غار + زعتر طازج) كميات قليلة لا تبالغون

لو مافيه زعتر فرش حطوا رشة من الزعتر الناشف

م ص فلفل اسود حب

—————————

نبدا نسوي المرق نكون مجهزين العظم و نحفظ اللحم بالفريزر لو ماتبون تستخدمونه بنفس اليوم

راح يطلع عندنا هيكل الجسم – ٢ الأرجل – ٢ اجنحة الدجاج

نحطه بقدر متوسط الحجم و نصب الموية و نحط القدر على نار متوسطة لين تبدا تطلع مثل الرغوة و نشيلها بصفاية بعدين نضيف باقي المقادير و نخليه لمدة ساعة و نص على نار هادية من غير ماتغلي الموية

و بعدين نصفيه و نستخدم  للوصفة من ٥٠٠ مل لأزود شوي  حسب ثقل الشوربة اللي تبونها و الباقي تحفظونه بالثلاجة لمدة ٤ ايام او بالفريزر تقعد ل ٣ شهور

و الحين وقت الشوربة مرا سهلة ماتاخد نص ساعة طبخ

نحمس البصل لين يذبل تماما بعدين نضيف الشمندر و نقلب لمدة ١٠ دقايق على نار هادية تأكدوا ان كمية الزيت كافية للتشويح عشان لا ينحرق و يلسع

بعدين نضيف الزعتر و الخل او الليمون و السكر ونقلب شوي لين يذوب السكر بعدين نضيف مرق الدجاج و نتركه يطبخ لمدة ٢٠ دقيقة او لين يذبل الشمندر 

درجة ثقل الشوربة يرجع لكم انا عن نفسي احبها ثقيله ف ضفت نص لتر بس، يعني انا اقول افضل ضيفوا ازود من كميتي للي مو متعود على شوربة الشمندر

بعدين نضيف السور الكريم و نقلب بالويسك، و نطحن الشوربة و آخر شي نضيف الملح

قدموا مع الشوربة خبز محمص عشان تزيد لذاذتها 😛

بالعافية