اهلييين شخبااركم..مبارك عليكم الشهر و كل عام وانتم بخير الله يجلعنا من صوامه و قوامه

ان شاء الله راح نبدا سلسلة من وصفات رمضان و سويت مجموعة وصفات بعيد عن الأطباق التقليدية كتغيير للروتين

و يارب تعجبكم 

راح نبدا بوصفة شوربة الدجاج و الوصفة مقسمة لجزأين : جزء راح نسوي فيه المرق وهي وصفة اساسية لأي شوربة لو تبون تستغنون عن المرق الجاهز

وابي اوضح معلومة بين 

Broth,,Stock

الفرق بينهم هو ان 

Broth

مرق يحتوي على قطع لحم مو بس نستخلص من العظم

يعني مثلا مرق من دجاجة كاملة مع اللحم 

اما الStock

 مرق من العظم بس

و الجزء الثاني من الوصفة اللي هو طريقة الشوربة و تكثيفها من غير كريمة 

عن طريق الرو Roux — خليط من دهن ودقيق يساعد على تكثيف الصوصات و الشوربات

تقدرون تضيفون الشوربة أي اضافات ثانية من بازلا او بطاطس او جزر او مشروم اي شي في بالكم بس انا حطيت لكم الوصفة الأساسية اما الاضافات الثانية حسب ذوقكم

—–

مقادير المرق:

حجم 1000 جرام دجاج

نص جزر مقطع حلقات او شكل طولي

1 بصل متوسط الحجم مقطع جوانح كبيره مع قشرتها

1 عود كرفس مقطع تقطيع كبير

1 ورق غار

ربع حزمة بقدونس

و نص م ص زعتر ناشف

لتر و 700 مل  موية بدرجة حرارة الغرفة

مقادير الشوربة:

دجاج مقطع تقطيع صغير – من نفس الدجاج اللي طبخناه مع المرق

3 م ك دقيق ابيض

2 م ك زبدة طرية

———————————————————–

طريقة المرق

نغسل الدجاج بدقيق ..رشوا الدقيق في كل مكان و بعدين غسلوه نفس هالطريقة عيدوها مرتين

بعدين ننشفها بمناديل مطبخ

و نحط كل المقادير في قدر مناسب لحجم الدجاج بحيث لا يكون صغير و لا كبير 

لو كان حجم القدر كبير عن المقادير راح تضطرون تضيفون موية اكثر من الكمية المطلوبة و يطلع معاكم المرق خفيف

نصب الموية لين يغطي الدجاج تماما انا حطيت كمية الموية تقديرية بس احتمال تحتاجون اكثر شوي

بعدين نحط القدر على نار متوسطة لين تبدا الموية  تغلي تقريبا بعد 10 دقايق و تطلع رغوة بيضا و لازم تشيلون بالصفاية 

بعد 10 دقايق ضيفوا الأعشاب اللي هي البقدونس وورق الغار الزعتر..

ونحط الحديدة تحت القدر و نوطي النار و نخلي المرق لمدة ساعة و 10 دقايق

بعدين نصفي المرق بشاش ابيض كبير او قماش قطن خاص بالمطبخ..انا هالمرة صفيته بفلتر قهوة كنت مره دقيقة بزيادة بس بإمكانكم تصفونها بمصفى كبيره

نترك المرق على جنب لين يبرد لو في حالة تبون تحفظونه بالثلاجة لا تحفظون المرق وهو حار

بإمكانكم تسوون المرق قبلها بليلة وتحطونه بالثلاجة راح تطلع مثل طبقة الدهن على سطحه شيلوها قبل الطبخ

طريقة الشوربة:

ملاحظة:

هنا لازم يكون المرق مسخنينه او حار يعني لا يصير بارد او بدرجة حرارة الغرفة

نذوب الزبدة بعدين نضيف الدقيق  ونحمسه لمدة 5 دقايق تقريبا على نار شبه واطية لين يبدا يقلب لونه اشقر 

بعدين نضيف المرق الحار شوي شوي ونخلط بنفس الوقت لين تحسون تجانست المقادير مع بعض

و نبدا نحط كل المقادير الثانية من خضار  لو بتضيفون خضار إلا الدجاج آخر شي لأن مطبوخ جاهز

و نخلي النار واطية ونطبخ الشوربة لين تثقل… الصراحة ماقدّرت الوقت بس تقريبا اخذ معاي من ربع ساعة إلى 20 دقيقة بالكثير ماراح تطول

و طبعا لا تنسون الملح و الفلفل الأبيض

ملاحظة:

لو حفظتوا الشوربة في الثلاجة راح تلاحظون انها تتماسك مرا و تجمد هذا وضع طبيعي بس ترجعون تسخنونها راح ترجع سائلة مثل اول

و بالعافية