اهلين و سهلين
السينمون الرولز من الأكلات الشتويه المفضله عندي مااخفيكم ان مرت علي كل النتائج السيئة لما كنت مبتدئه بالطبخ، مره تطلع ناشفه و السينمون ضايع ومره قاسيه لدرجة وحده كانت مركبه تقويم ماقدرت تاكلها او مره يكون الخبز مفتت ومافيه طعم
و جربت اسويه بعجينة البريوش بالنسبه لي مااحبيته بس ممكن غيري يفضله ولكن ماحسيت انه طبق فريد بعجينته و قوامه الخاص يعني عادي بريوش مع قرفه وبس
وانا ضد اني استخدم عجينة معجنات مثل الذهبيه و العشر دقايق و غيرها من العجاين المشهوره في النت في اني اسوي منها سينمون رولز لأن مستحيل راح تطلع معاكم مثل قوام الخبز و السينمون رولز يعتبر نوع من انواع الخبز
وانا متأكده لو جربتوا العجينة اللي بالوصفة من ريحتها قبل لا تخبز راح تغيرون رايكم حتى عن الجاهز اللي موجود بالسوق
في الوصفة هنا حلاه خفيف و الصوص ستيكي او لزق بالرولز لأن يعتبر كوجبة فطور مع قهوه او شاي بس لو ودكم تزيدون الحلا شوي باإمكانكم تسوون صوص كراميل مره ثانيه بعد ماينتهي من الخبز و تصبون عليه و هو حار
المقادير:
العجينة
كوبين و ثلاث أرباع كوب دقيق
٢ م ص خميره
١ م ص ونص ملح
م ك سكر
٢٠ جرام زبدة باردة مقطعه مكعبات صغيره
٢ بيض بدرجة حراره الغرفه
٢٠٠ مل حليب بدرجة حرارة الغرفه
مقادير الحشوة
نص كوب سكر بني فاتح
١ م ك قرفه مطحونه
٢٠ جرام زبدة مذوبه
مقادير صوص الكراميل
كوب سكر بني
كوب بيكان و نكسره بالسكين
٣ م ك زبدة
٣ م ك لبن
مقادير جليز الجبن الكريمي
١٠٠ جرام جبن كريمي (فيلادلفيا) بدرجة حرارة الغرفه
ربع كوب لبن
icing sugar – نص كوب سكر بودره
—-
الصينية المستخدمة ٩في ١٣ انش او صينتين ٤ في ٨
الخطوه الأولى: العجن
نخلط المواد الجافه مع بعض بعدين نفرك الزبدة البارده مع الدقيق
ونبدا نعجن بالعجانه ونضيف البيض على دفعات تندمج الاولى و نضيف الثانيه
ونصب الحليب و العجانه تشتغل و نخليها تعجن تقريبا لمدة ٥ دقايق او لين تصير معاكم العجينه ناعمة و تلزق باليد
طريقة سهلة تشيلون العجينه من العجانة ان تدهنون يدكم زيت عشان لا يصير صعب النقل لصحن ثاني ونسوي العجينه على شكل كوره و نغطيها و نخليها تخمر لين يتضاعف حجمها
الخطوه الثانيه: صوص الكراميل
في قدر نحط كل مقادير الكراميل و نقلب لين يذوب السكر تماما و نصبه على طول في الصينيه
ملاحظة: نسوي صوص الكراميل لما تكون العجينة جاهزه للفرد
الخطوه الثالثة: الفرد و الخبز
نشغل الفرن على درجة حراره ٢٠٠ سيلزيوس
نضغط على العجينة المنتفخه باليد و نطلع الهوا من غير عجن و نفردها بطول ١٠ انش و عرض ١٣ انش
حاولوا تفردون بخفة و تنثرون دقيق يكفي انه مايتعبكم وقت الفرد لان راح تكون العجينة مره لينه
نمسح الزبدة الذايبه على العجينة و ننثر السكر البني و القرفه
و نلف العجينه لين نوصل لنهاية الطرف و نلزقها عشان لا تفتح وقت الخبز
و نقطع بمقدار ١ انش بيطلع لنا ١٢ رولز
و نحطها في الصينيه بينهم مساحه للتخمير الثاني
و نغطي الصينيه بنايلون و نترك الرولز لمدة ٢٠ دقيقه قبل الفرن بعدين ندخلهم الفرن لمدة ١٥ دقيقة او ٢٠ دقيقة بالكثير
الخطوة الرابعه: الجليز
نخلط الجبن الكريمي بالملعقة حتى يكون سهل التقليب، و نحطه بقدر مع باقي مقادير الجليز لين يصير مثل السائل
ملاحظة: بإمكانكم تسوون الجليز قبلها بليله و ينحط بقاروره قزاز و ينحفظ بالثلاجة و بعدين يتسخن قبل التقديم
اول مايخلص السينمون رولز من الفرن اقلبوه على صحن التقديم او اي صحن على طول اول مايطلع من الفرن ماتنتظرون ولا دقيقة لأن اذا برد الكراميل راح يلزق الرولز بالصينيه
و آخر شي صبوا الجليز قبل التقديم
Comments (43)
ليه كمية الدقيق مو بالجرام 😢
بس عموما يعطيك العافييييبه
ههههههه سامحيني هالمره ان شاء الله الوصفات الجايه كلها بالجرام
شكرا شيف ولو سمحت جبن فيلادلفيا مش متو فرة هل ممكن اعمل الكريم تشيز فى البيت انا عرفت من الانترنت انى ممكن اعمل الزبادى لبنة واستخدمها وياريت تعملى درس عن الخل وطريقة عمله فى البيت خصوصا خل الرز والشعير اسف على الاطالة
ان شاء الله الدروس الجايه بتكون عن الجبن المنزلي، بالنسبه للخل هو شغله صعب و يحتاج احتراف في الشغل بس بحاول ابسطها
شكرا شيف على مجهودك
العفو ربي يسعدك
اللبن هو الحليب؟
لا اللبن العادي مو حليب
يعطيك الف عافيه يارب مجهود رائع وشرك أروع ومبسط في ميزان حسناتك ان شاءالله
الله يعافيك مشكوره <3
شرح
كم درجة الحرارة بالفهرن هايت؟
وبالنسبة للكراميل مايتجمد بالصينية وانا اقرد ؟
٣٧٥ فهرنهايت
لا الكراميل ماراح يجمد بس يتماسك شوي
تمام شكرررراً. احب اطبق من حسابك💗
سويت التراميسيو واهل ماتوعليه. بس سويت ضعف المقدار اللي انت حاطته ومقدارك فيه ٢٥٠جرام جبن والجبنة اللي في التميمي٤٠٠جرام وصعبة اشتري ثانية على ٥٠او١٠٠جرام ايش الحل؟
عندك ميزان بالبيت؟؟ انا بعطيك المقادير الباقيه حتى البيض بالجرام حسب كمية الجبنة اللي بتجيبينها
ايه عندي ميزان
الله يجزييك خير
اكن لك من الشامرين
المقادير ل ٤٠٠ جرام جبن ماسكربون
٦٠ جرام صفار بيض
٧٠ جرام سكر
٢١٢ كريمة خفق
تقريبا ٤٠٠ مل قهوة
طبقت السينبون اليوم مرررررة لذييذ
بس شوي الشكل طلعوا كباررومورمرتبات زيك ماشاءالله
وفيه سؤال ليه في الحشوة سكر بني فاتح؟ليه فاتح؟
كم حجم الصينيه اللي استخدميتها؟؟
عادي ماتفرق في الحشوة استخدمي بني غامق لو تفضلينه
حجمها١٣في٩انش تقريبا
مرحبا مبدعتنا حصة..
مرره متحمسه أجرب هالوصفه، وإن شاء الله أجربها لعزومة بنات،
بس بغيت أسألك أنا في بلد غير عربي وما عندهم لبن، بس الروب هو اللي متوفر
ممكن أستبدل اللبن بالروب؟
الشي الثاني ممكن أعجن وأسوي كل الخلطه من بالليل وأحطها عالثلاجة، والصبح أحطها عالفرن؟
ملاحظة:
ممكن تكون الوصفات بالجرام وبالكوب
ما عندي ميزان وصعب علي أوازن المقادير
شكرا لعطائك❤️
اهلا حبيبتي
استخدمي buttermilk
ايه ممكن تسوين كل شي حطيه بالثلاجة و قبل الخبْز بساعة طلعيه من الثلاجة و خليه لين يتضاعف حجمه و اخبزيه
ان شاء الله المقادير الجاية بالجرام و الاكواب ولا يهمك 🙂
قصدي أعجن العجينة وأضيف لها القرفة وأقصها وأحطها في الثلاجة، واليوم الثاني أكمل أسوي الصوص وأخبزها في الفرن…؟ ممكن صح ما بتضيع علي؟
🌹🌹
سوي كل الخطوات مع صوص الكراميل و حطيها بالصينيه اللي راح تخبزين فيها و طلعيها من الثلاجة قبل الخبز بساعة لين تنتفخ
هذي الخطوه انا اسويها لو كنت ابغاه على الفطور
سلام شيف حصة
تسلمي ع الوصفة الذيذة وان شءالله اطبقها باقرب وقت
بس حبيت أسألك ايش تقصدي باللبن بالضبط؟
لانه نحن نسمي الحليب(سواء بودرة او سائل ) لبن
فهو ايش مقصد هنا بالضبط
حليب عادي والا زبادي والا ايش؟
شاكرة لك!
اللبن قوامه سائل و طعمه حامض قريب من الزبادي
انتي من اي دولة؟
؟حصه قلتي عادي اسويها من بليل واحطها بالثلاجه ..طيب بسوي كذا بس سوالي هل اخلي العجينه بعد العجن تتخمر ثم افرد او ع طول اعجنها وافردها
وهل اقدر اعجنها واخليها تتخمر ليله كامله ثم الصباح افردها ؟
فيه طريقتين للتخمير لو في حال تبين تخبزينها الصبح
إما تعجنين و تخلينها تتخمر وتفردينها وتسوين كل الخطوات ماعدا التخمير الأخير اللي هو قبل الخبز بالفرن ماتسوينها الا الصبح يصير بعد ماتسوين كل الخطوات و تحطين الرولات بالصينيه تغلفينها مره كويس بالنايلون حطيها بالثلاجة لليوم الثاني، و قبل الفرن بساعة (لأن الجو بارد) طلعيها واتركي الرولات تتضاعف حجمها و دخليها الفرن
–
أما لو بتفردين اليوم الثاني اعجني و خلي التخمير بالثلاجة يعني ماتنتظرين لين تتضاعف حجم العجينه و تدخلينها الثلاجة، لا، اعجني و كوريها و حطيها بصحن مدهون بشوي زيت و غلفيها و حطيها بالثلاجة و اليوم الثاني طلعيها لين يتضاعف حجمها و كملي الخطوات
شكرا لك بسوي الطريقه الثانيه
مو عندي سكر بني ايش اسوي؟ والجبنة الكريمي مالحه ازاي استخدمها مع شيء فيه سكر وقرفة وحلا
لازم سكر بني تعطيه طراوه
و الجبن الكريمي اقصد شركة فيلادلفيا
يعطيك العافيه وتسلم يدك ي قلبي ابي اسألك عن مقدار الزبدة بالضبط
قصدك اللي مع الكراميل؟ من ٣٠ ل ٤٠ جرام تقريبا
اللي مع العجين كاتبه ٢٠ جرام يعني قصدك ربع اصبع الزبدة العادي
ايوا ربع قالب زبدة ١٠٠ جرام
يعطيج العافيه حصه … بالنسبه. لصوص الكراميل والجيلز تحطينه عالنار والا شلون مافهمت خطوتهم عدل وهل تخلطيهم مع بعض علطول لانه وايد غامق كراميل فالصوره
وهل اللبن المستخدم هو لبن مش حليب صح؟
الكراميل على النار عادي مثل الطريقة العادية، لونه غامق لأني استخدمت السكر البني الغامق مش الفاتح و لأنه مو متوفر دائما ماحبيت احدده بالمقادير يصير اي نوع فاتح ولا غامق ماتفرق
و الجليز تسوينه في الأخير بعد ماطلعتي السينمون رولز من الفرن و تقلبينه من غير طبخ
و اللبن هو اللبن من المراعي او اي شركة مو حليب
سويت الطريقه ، العجينة خياليه شي مو طبيعي ، الله يسعدك ويوفقك في حياتك حبيبتي كثر ماستفدت من حسابك ❤️ بموازين حسناتك يارب ❤️
بالعافية يارب فرحتيني والله يارب تعجبك كل الوصفات
بس بسألك حبيبتي بعض وصفاتك يكون فيها لبن، و انا بأمريكا مافي لبن ، هل ممكن استبدله بالحليب او شي Heavy cream or half and half ؟
حبيبتي دوري على buttermilk
السلام عليكم شيف حصه 😍
كيف اقدر اخلي العجينه بالقرع يعني يمون سينابون القرع مره قد أخذت الوصفه من شخص ما وضيعتها بس كانت جيده جدا وطريه مره
عليكم السلام و رحمة الله
حبيبتي اذا تبغين الوصفة بالقرع شوفي صفحة خلود عولقي علي انستغرام راح تحصلين الطريقة