مساء الخير

المطبخ التايلاندي مظلوم عندنا بشكل كبير ! وحتى ان لقينا مطعم تايلاندي  ماراح تلقون عنده طبق مضبوط إلا شوربة التوم يم  صراحة وهذا عن تجربة..

طيب ليش التايلاندي مستواه عندنا متدني لهدرجة؟

لو نتعمق فيمفهوم الكويزين التايلاندي نشوفه يهتم لأربع عناصر أساسية في الطعم

الحار + الحلو + الحامض + المالح

والعناصر هذي تجتمع باختلاف المقادير ..يعني ابي الطعم الحامض يبرز من الليمون اوالخل ؟..اختار واحد منهم عشان يضيف لي عنصر الحموضة

بالاضافة إلى الوزنية بينهم..وهذا الشي يجي مع الخبره او التجارب الكثيره لين نوصل للطعم المضبوط اللي تبرز فيه كل العناصر من غير ما واحد منهم يطغى عن  الثاني

يعني سلطة اللحم التايلاندية ذقتها في اماكن كثير بجدة..الا وفيها شي غلط..يا اللحم ناشف او اساسا مافيه نكهة بس حاطين ليمون وفلفل حار وشوي سكر الطبق مخبوص ولا يمس للتايلاندي بصله..

انا ماقد رحت تايلاند ولكن زرت مطعم تايلاندي في ألمانيا (المطاعم التايلاندية في ألمانيا تقدم اطباق  مثل لو تاكلونها في تايلاند بشهادة ذواقة أوربيين)..يعني لو اقول لكم من كثر مانشبت لهم في المطعم عشان اتذوق الأطباق صاروا اصحاب المطعم يسلمون علي بالشارع و يعزموني و يتشرهون اني ماجيتهم ههههههههه

صدق في حياتي كلها اول مرا استمتع بالتايلاندي الحقيقي ..صح اني انلسعت من الحار لين دخنت اذاني ههههههههههه بس كان الاستذواق متتتتعة 

في هذي الوصفة لو اقول لكم مرا قعدت اجرب على الدريسنق او الصوص لين يضبط ماابالغ يمكن 5 او 6 مرات واغلبها تفشل

كيف اني اجمع بين الأربع عناصر ماكان سهل او يمكن انا دقيقة بزيادة تقدرون تقولون كذا ! بس كنت مهتمة جدددددا اني اوصل لكم للوزنية المضبوطة..ولكن انا عندي كنترول من ناحية الفلفل الحار والثوم

انا مااستحملت الحرارة وخففتها وكمية الثوم برضو صحيح انه يضيف طعم رهيب مع الدريسنق بس خففته في وصفتي لأن اللي ذقتها كانت مرا اووفر ..يعني لو زودتوا كمية الثوم بالعكس مو غلط إلا رهيييب رهييب ويفرق بالطعم بس زي ماقلتلكم انا عندي كنترول في استخدامه 🙂

في مقادير الصلصة او الصوص حاولت قد مااقدر احطها لكم بالمقاييس المعيارية..فطبقوا حسب المكتوب وان شاء الله تعجبكم

—————————————

المقادير:

شريحتين  Rump steak..او فيليه او اي قطعة ستيك بس الأفضل الرمب

2 م ك صويا صوص

م ص كزبره ناشفة مطحونة

م ص كمون 

2 فص ثوم مهروس

كوب خس مقطع شرايح نحيفة

1 جزر كبير مقطع جوليان – راح اشرح تحت الطريقة

2 خيار مقطع جوليان نفس الجزر

نص كوب نعناع مفروم ناعم

نص كوب كزبرة خضرا مفرومه

نص كوب فول سوداني محمص و مجروش – اختياري

مقادير الدريسنق:

نص كوب خل الأرز او خل ابيض

1 م ك سكر ابيض

2 م ص صوص السمك

1 قرن فلفل احمر

1 فص ثوم مهروس

——————————————————

الدريسنق:

نشيل البذور من الفلفل ونقطعة صغار..ونخلط كل المقادير في علبة لين يذوب السكر..و نغطيها و ندخلها الثلاجة ليلة عشان تتجانس مع بعض

تتبيله الستيك:

نخلط جميع مقادير التتبيلة مع بعض (الصويا صوص + الكمون + الكزبره + الثوم) و نتبل فيها اللحم ونتركه ساعتين يتتبل او ليلة كاملة قبل الطبخ

وقت الطبخ نجففها  بمناديل المطبخ من أي سائل 

طريقة طبخ الستيك نفس الأسلوب اللي معتمدته في هذا الدرس

هنا

بعد طبخ الستيك لازم لازم يرتاح  6 دقايق على شبك عشان لا تطلع العصارة في السلطة

قطع الجزر و الخيار لجوليان:

الجوليان هو تقطيع الخضار لأعواد طولية..وحطيت لكم اسهل طريقة اننا نبشرالجزر او الخيار بشر طولي وبعدين نقطعها بالسكين لأعواد نحيفة او بشكل طولي

نخلط الجزر و الخيار و الخس..و نضيف نص من كمية الدريسنق اللي سويناه بعدين نقطع الستيك لشرايح نحيفة ونضيفه على الخضروات بعدين نصب النص الباقي من الدريسنق و آخر شي النعناع المفروم  و الكزبرة

انا ادري كنت مرا دقيقة سامحوني على الإطالة هههههههه و بالعافية عليكم وان شاء الله تعجبكم