مساء الخير

في هذا الطبق كان اهم شي عندي اللي هي سلطة العدس هههههه من فترة كنت افكر ابي اقدمها مع شي لذيذ و يمشي معاها و جربت السالمون و طلع فعلا لذيذ عجبني..وهذا الطبق صحي مافيه إلا م ك زيت زيتون للسلطة و تقدرون تخففون كميتها لو تبغون وماياخذ معاكم وقت

بالنسبة للخلطة اللي فوق السالمون لو تشوفون بالصورة هذا  فينيغريت الكيبرز مع اعشاب و الكيبرز اللي زي الزيتون بس حامض اكثر انا ماحطيت وصفتها اللي يبيها يكتبلي تعليق تحت الوصفة و بكتبها له

و لتكنيك سلق السالمون انا طبقته على فيليه واحد و كان حجمه صغير لو كان حجمه اكبر او اكثر من قطعة طبقوها على مقلاة اكبر و راح اشرح في الوصفة تحت تفاصيل اكثر عنه

———————–

المقادير:

1 فيليه سالمون مع الجلد

1  ليمون مقطعة شرايح نحيفة

3 سيقان بقدونس من غير الاوراق

3 سيقان شبت من غير الاوراق

مقادير السلطة:

نص كوب عدس اسود منقوع بموية فاترة قبل الطبخ بساعة

م ك عصير ليمون

م ص كمون

م ك زيت زيتون

2 م ك بقدونس مفروم ناعم

كوب طماطم كرزية مقطعة على كيفكم هههههه

ملح و فلفل اسود

——————————————————

نحط شرايح الليمون على المقلاة و فوقها سيقان الاعشاب

و نحط قطعة السالمون في الوسط جزء الجلد تحت و اللحم  فوق و نصب موية بدرجة حرارة الغرفة لحد مايغطي ثلاث أرباع السالمون تقريبا

و نشغل النار على العالي لحد ماتغلي الموية و بعدين نوطيه و نقفل على المقلاة بغطا و نتركه تقريبا إلى 10 دقايق حسب حجم السالمون احيانا يوصل ل 16 دقيقة يعني من حجم لحجم تختلف فترة الطبخ

بس لا تطبخونه اكثر من اللازم راح تطلع مرارة الليمون و تخرب الطعم فأنتوا شوفوا بعد 10 دقايق اذا يحتاج اكثر او لا

بعد مايستوي ونشيله بحذر لأن ممكن يتفتت معاكم راح يصير قوامه يشبه التونة المعلبة تقريبا عشان كذا انتبهوا وانتوا تشيلونه من المقلاة

انا شلت الجلد من على السالمون وانتوا براحتكم اذا تبون تخلونه 🙂

طريقة السلطة:

بعد مانقعنا العدس نسلقه تقريبا لمدة 20 دقيقة او لحد ماتستوي الحبات و نصفيه و نتركه يبرد و نجهز الصوص نخلط الزيت زيتون و الليمون و الملح و الفلفل الأسود و الكمون  نصبه عليه و آخر شي البقدونس المفروم و الطماطم الكرزية

ممكن يعني تضيفون جبنة فيتا لو بتسوون السلطة بس من غير السالمون بتطلع لذيذة بعد 

و بالعافية