مساء الخير

طبعا اللي اقصده هو لسان العصفور هههههه بس تعرفون لما تبون توصلون لنكهة في راسكم و في النهاية تتوهقون بالاسم ! هذي حالتي بهالوصفة هههههههه

انا مرا ذقتها على شكل سلطة بحريات مع ربيان و حبار اعتقد واعشاب صدق كانت لذيذة بشششكل..و  سلطة الريزوني تجي بكذا شكل عموما بس حلاوة هالسلطة ببساطتها ممكن مع نفس هالمقادير تضيفون جبنة فيتا و مع البقدونس المفروم تضيفون نعناع برضو

هي سهلة و سريعة ووجبة متكاملة..و حاولوا تطبقون نفس كمية المقادير مع بعض عشان لا يزيد شي عن شي و يضيع لكم الطعم

المقادير:

ثلاث ارباع كوب لسان العصفور او ريزوني

1 حبة كوسا متوسطة الحجم مقطعة مثلثات

بصل صغير الحجم مفروم ناعم

نص حبة فلفل رومي احمر او اصفر مقطع مربعات صغيره

ثلثي كوب زيتون شرايح..أي نوع يعجبكم انا ضفت الأخضر

فص ثوم مهروس

3 م ك بقدونس مفروم ناعم

م ص اوريغانو ناشف

مقادير الصوص:

2 م ك عصير ليمون الأصفر الكبير

نص م ك زيت زيتون

ملح و فلفل أسود

اخلطوا الصوص لحد مايتكون عندكم مستحلب او تحسون الليمون تجانس مع زيت الزيتون

—————————————————

نسلق الريزوني نفس طريقة أي باستا بس من غير زيت و بعد مايستوي  نصفيه و نخليه على جنب

نحمس البصل بزيت زيتون لحد مايصير لونه ذهبي و يذبل..هالنقطة مرا مهمة عشان لا يطلع طعم البصل في السلطة بعدين نضيف الثوم المهروس و الخضروات و الأوريغانو و نقلب لمدة 3 دقايق تقريبا واذا حسيتوا انه يحتاج زيت زيتون ضيفوا شوي..بعد ماتطبخ الخضروات و تذبل نضيف الملح و جزء بسيط من البقدونس المفروم

نشيل الخضروات من المقلاة في صحن و نتركها تدفى

نضيف الخضروات و الزيتون على الريزوني ونقلب

بعدين نضيف الصوص و باقي البقدونس واذا حسيتوا يحتاج بقدونس زيادة ضيفوا..

نفس الشي للملح الكمية حسب الذوق عشان كذا ماحددت

و الأحلى تنوكل هالسلطة باردة خلوها تبرد بالثلاجة ساعة وقدموها

و بالعافية