يمكن تغيير النكهه حسب الذوق او المواسم اخترت نكهة تناسب لأجواء رمضان و كتبت لكم الوصفه بالجرام و الأكواب

المقادير:

ثلاث ارباع كوب – ١٥٠ جرام  رز مصري او اي رز قصير الحبه

٨٠٠ مل حليب كامل الدسم 

ثلث كوب – ٥٠ جرام سكر

٣٠ جرام زبدة

٣ صفار بيض

ثلثي كوب فستق مجروش

من ملعقة لملعقتين ماء زهر او حسب درجة التركيز اللي تفضلونها

مقادير الكاسترد

نص كوب – ١٠٠ جرام سكر ابيض ناعم الحبيبات او نوع كاستر

٣ صفار بيض

٢٠٠ مل حليب كامل الدسم

م ص زعفران مطحون – نفس شعيرات الزعفران طحنتها بالهاون

———-

نشغل الفرن على درجة حراره ٢٠٠ سيليزيوس

نغسل الرز و نسلقه بالبداية بمويه بس لمدة ١٠ دقايق عشان نتخلص من النشا، 

و في قدر ثاني نسخن الحليب لين يغلي ونضيف السكر ونقلب لين يذوب، نحط الرز المسلوق والزبدة و نتركه يطبخ على نار هاديه لمدة ٢٠ دقيقة

نطفي النار و نضيف باقي المقادير (صفار البيض و الفستق و ماء الزهر) ونكون مجهزين القوالب او الريمكنز و نوزع خليط الرز تقريبا طلع معاي خمس قوالب

و ندخله الفرن من تحت و فوق لمدة ١٠ دقايق 

ويقدم دافي او بارد

كاسترد الزعفران

نخفق صفار البيض مع السكر لين يتكثف، و نسخن الحليب مع الزعفران و المهم مايوصل لنقطة الغليان لو لاحظتوا طلع مثل البخار معناه صار جاهز

نصب الحليب بالتدريج على صفار البيض المكثف و نخفق بنفس الوقت بشكل سريع نرجع خليط الكاسترد للقدر و نطبخه على نار هاديه جدا من غير غليان عشان لا يطبخ البيض مع تقليب مستمر و خفيف بملعقة خشبيه او سيلكون لمدة من ٨ ل ١٠ دقايق لين يثقل قوامه

و نصفيه و نحفظه بعلبه زجاجية و يقدم ساخن او بارد مع الرايس بودنج

—

اعتذر اني مادعمت التدوينه بالصور لأن ماكان فيه وقت للتصوير و ان شاء الله يكون شرحي واضح لكم 

و بالعافية