اهلا وسهلا

ادري اني مقصره معاكم في دروس الحلويات الفترة الأخيره و هذا يرجع للمزاج صراحة هههههه، عاد اللي متابعني من اول يعرف اني اعترفت انه مو جوي الحلويات نهائيا ولا اشوف نفسي فيها (مدري ليش بكل بوست للحلويات اكتب هالمعلومة :\ ) بس افضّل بعضها و احب اسويها احيانا فلذلك اتحمس و انزلها على هيئة دروس مفصلة لأن ادري فيه ناس زيي ماعندهم طولة بال و صبر و يعتمدون عالوصفات المضمونه نتايجها << ماعليكم اضبطكم ههههههههه

البارفيه هو عبارة عن حلا بارد مثل الآيس كريم اساسه كريمة الخفق يعني من دون كريمة خفق ماهو بارفيه، و في الفترة الأخيرة تشعبت طريقته لثلاث تكنيكات ،  إمّا بالسيرب المنكّه او الكاسترد او الفواكه المهروسه وكلها بالنهاية يتم تقليبها بالكريمة المخفوقه

و الفرق بينهم هو في القوام و الطعم النهائي،، طريقة السيرب تكون النكهة فيه جدا واضحة و مركزة،، طريقة الكاسترد كريمية و ريتش اكثر ،، الفواكه المهروسه اثقلهم قواما و طعم

انا شخصيا في هذا الدرس اعتمدت على طريقة السيرب  لأن احب النكهة واضحة و مركزة مع قوام كريمي، و النكهات اي شي تفضلونه او تحبونه او المتوفر مو لازم تعتمدون على النكهة اللي اضفتها

اهم شي تتبعون خطوات الدرس و كل مرا غيروا النكهة و الإضافات من فوق لأن طريقته سهلة ماتاخذ ١٠ دقايق 

في البارفيه عادة له قالب خاص فيه و يقطعونه شرايح مثل خبز التوست طبعا اجواءنا ماشاءالله ماتساعد على نجاح هذا الأسلوب ولا بيذوب و يقلب ميلك شيك 🙂 انا حطيته في قوالب صغيرة بحيث ما اضطر اقطعه واحطه بصحون يصير خلاص وقت التقديم احط الاضافات و اقدمه 

انا سويت بنكهتين مختلفة بالقهوة  و الفانيلا و نكهة بالليمون و برضو لي هدف ان في حالة كانت النكهة المضافة سائلة او جامدة كلها بتضبط معاكم ان شاء الله

الطريقة الأساسية للبارفيه باختلاف النكهة

المقادير :

١٠٠ جرام سكر ابيض = نص كوب

٢ م ك موية 

٤ صفار بيض

١٠٠ مل كريمة خفق باردة

….. هذي المقادير أساسية لأي نكهة بارفيه بتسوونه …..

نضيف الموية على السكر و ننتظر حتى يذوب السكر و يتكون السيرب عند درجة حرارة ٢٣٠ فهرنهايت

السيرب هنا لونه بني بسبب اني اضفت ملعقتين كبيرة قهوة بدل الموية ..قهوة محضرة بطريقة عادية سواء اسبريسو او من الموكا بوت بس المهم تكون ذات جودة ممتاز 

اذا كانت النكهة المضافة عبارة عن مستخلص لا تلغون الموية يصير تضيفونه مع السكر و الموية في السيرب

أما اذا كانت النكهة المضافة جامدة مثل (بشر ليمون او برتقال) نضيفه مع صفار البيض – انا اضفت م ك بشر ليمون

بعد مايتكون السيرب و يوصل لدرجة الحرارة المطلوبة نصبه على صفار البيض و الفانيلا وببطء مع التحريك بالخفاقة اليدوية بشكل سريع او بالعجانة مع اداة الويسك برضو يضبط

لين ننتهي من صب السيرب و يتكون عندنا قوام ثقيل و نوقف

لا تبالغون في خفق صفار البيض و السيرب حتى لا يدخل هوا زيادة فيه ، لأن زيادة الهوا او الفوم  يخرب و يقسم البارفيه بعد التبريد لقسمين،، فوق رغوه مثلجة و تحت قوام كريمي 

فلو حسيتوا فيه فوم زيادة اضربوا الصحن عالطاولة  كذا مرا لين يختفي

نترك الخليط لحد مايبرد تماما، لأن لو خلطناه  وهو دافي  مع الكريمة المخفوقة راح يذوبه

نخفق الكريمة لين تتكثف

و نقلبها مع خليط السيرب اذا برد من فوق لتحت لين يتجانس و نصبه بالقوالب و ندخله الفريزر لمدة ٦ ساعات على الأقل

بالنسبة للإضافات هي من ذوقي الشخصي و اضافتها اختياري يعني لو في بالكم شي ثاني افضل اكيد تقدرون تستغنون عن الموجود في الوصفة

————–

بارفيه بالقهوة و الفانيلا مع المكاديميا المملحة و المحمصة موكا كراميل صوص

المكاديميا المملحة و المحمصة

المقادير:

كوب مكاديميا غير محمصة

م ص ملح

م ك زيت زيتون

نشغل الفرن على درجة حرارة ٢٠٠ فهرناهيت و نخلط الملح وزيت الزيتون مع المكاديميا و نحمصها بالفرن مع التقليب المستمر بالكثير ماتاخد من ١٥ ل ٢٠ دقيقة

و نجرشها بالهاون او الطاحونه 

—

موكا كراميل صوص

الموكا عبارة عن خلط بين الشوكولاته و القهوة 

المقادير:

كوب سكر ابيض

٢ م ص سيرب الذرة الخفيف – لونه شفاف

نص كوب كريمة خفق – انا ضفت اكثر تقريبا وصلت لثلثي كوب

م ك قهوة سائلة

ثلث كوب شوكولاته ٧٠ بالمية مبشورة

نسخن السكر مع سيرب الذرة (سيرب الذرة مهم هو اللي راح يحافظ على قوام الكراميل سائل) لحد مايوصل لدرجة حرارة ١٦٠ سيليزيوس – ٣٢٠ فهرنهايت، نصب الكريمة ونحرك بطريقة سريعة راح تبدا تفور و تطلع فقاقيع، بعدين  نضيف القهوة و الشوكولاته و نحرك على النار دقايق لين تذوب الشوكولاته و نتركه يبرد و تقدرون تحفظونه في علبة بالثلاجة و تسخنونه و يدفى قبل التقديم

—————————————-

بارفيه بالليمون مع رازبيري  كومبوت بنكهة إكليل الجبل و بشر الليمون و فتات بالقرفة

او cinnamon crumbles 

رازبيري كومبوت – يفضل تحضيره قبلها بيوم

المقادير:

انا استخدمت نص كمية الرازبيري في البوكس المعتاد اللي بالسوبر ماركت

كوب موية

نص كوب سكر

م ص بشر ليمون

غصن إكليل الجبل

نقلب الموية و السكر بقدرعلى النار  لين يذوب السكر و تسخن الموية بس مو تغلي

ونصبه على باقي المقادير

ونترك الجار لين يبرد بعدين نقفله وندخله الثلاجة لمدة ٢٤ ساعة قبل الاستخدام

—

فتات القرفة

المقادير

نص كوب دقيق ابيض

نص كوب سكر بني

٥٠ جرام زبدة

م ص قرفة 

م ك عصير ليمون

نص م ص ملح

نهرس السكر مع الزبدة 

 و نضيف باقي المقادير ونخلطهم بعدين نجمعهم مع بعض لين تتكون عندنا كورة 

ونفتت الكوره على ورق خبز في صينية مناسبة لكميتها مو كبيره ولا صغيره 

و ندخله الفرن على درجة حرارة ١٨٠ لمدة ١٥ دقيقة مع التقليب المستمر كل ٥ دقايق

و بعد الفرن ننتظر عليه لين يبرد و نحطه بعلبة محكمة الاغلاق << متعوب عليها ههههه

———————

اتمنى يكون الشرح واضح لكم و اي استفسار يفضل تكتبونه في بوكس التعليقات

و بالعافية