يسعد مساكم

خبز الجبن من ألذ أنواع الخبز اللي يميز المخابز الألمانية مثل ما فرنسا عندهم الكروسون ألمانيا عندهم هذا الخبز ! كنت أقوم من بدري عشان اجيبه لأن من بعد الساعة 10 يخلص و ماتبقى ولا حبه

و يكون دايم على شكل ساندويتشات مع التركي المدخن و البيض المسلوق جدا لذيذ ! فيه محل بفرانكفورت صاحبته حرمه كبيره ويساعدها ولدها يسوون ساندويتشات اشكال و ألوان من هذا الخبز مع صوصات مختلفة باختياركم..

المحل مقابل فندق شتايغينبر غر فرانكفورت

المهم نرجع لموضوعنا..ميزة هذا الخبز كل ماطول كل ماطلع ألذ يعني انا احب طعمه بعد 3 ايام من يوم سويته لأن أساسا لازم يكون قوامه قاسي فيقعد كم يوم عشان يوصل للقوام اللي ابيه! ويكون مكشوف زي السكونز ممكن تغطونه بقماش او شبك

واذا سويتوه ساندويتشات شيلوا اللب لأن راح يصير مرا ثقيل مع الحشوة اللي بتحطونها

الطريقة مرا سهلة وان شاء الله يعجبكم

المقادير:

375 جرام دقيق أبيض – 3 أكواب إلا ربع

150 جرام جبنة جودا  مبشورة بشر صغير

ابشروها باردة عشان يسهل عليكم البشر بسرعة وماتنهرس

ملاحظة:

اساس الخبز هذا النوع من الجبن لا تغيرون لأي نوع ثاني

250 موية دافية

م ص سكر

م ص ونص ملح

2 م ص وربع خميرة

شرايح كبيرة من جبنة جودا

بياض بيض

————————————————————–

نخلط المكونات الجافة مع بعض..

الدقيق و الجبن المبشور و السكر و الخميرة من غير الملح..بالعجانة ونعجن على البطيء و نصب الموية لين تتجانس المكونات مع بعض

بعدين نضيف الملح و نعجن لمدة من 5 ل 10 دقايق على سرعة وسط لحد ماتصير عجينة ناعمة مرا وراح تلزق باليد

لما نشيلها من العجانة حاولو تنثرون شوي دقيق عليها عشان تتحكمون في العجينة بسهولة  وكوروها وحطوها في صحن كبيرمنثور شوي دقيق

ونتركها تتخمر لمدة ساعة في مكان دافي أو إلين ترتفع و يزيد حجمها

بعد ساعة ناخذ من العجينة قطع بحجم 100 جرام كل وحدة او انتوا قدروا انها تكون قطع متساوية في الحجم

نجمع كل الأجزاء على بعض بالوسط

نقلبها ونحرك باليد بشكل دائري لين نحصل على شكل كورة

و نحطها في نفس الصينية اللي راح نخبز فيها طبعا تكونون حاطين ورق زبدة

و بعد مانخلص من كل الكور نغطيها بقطعة قماش و نتركها تتخمر كمان لمدة ساعة اهم شي مايدخلها هوا عشان لا تنشف

و نسخن الفرن على درجة حرارة 200 فوق و تحت

بعد التخمير و قبل الفرن نطلي كور العجينة ببياض بيض في كل الجهات بس انتبهوا لا ينزل لقاعدة العجينة عشان لا تلزق العجينة وقت الخبْز في الصينية و ماتكبر و تنتفخ

انا مالقيت شرايح كاملة من جبنة جودا هو الصح ان الشريحة  كاملة تغلف كل قطعة العجينة من فوق..يعني بعد ماتخمرت العجينة و غلفتوها ببياض البيض جيبوا شريحة الجبن و غطوا فيها العجينة

بس اللي مايلقى شرايح جودا ممكن يسوي زيي انا بشرتها بشر كبير  و غطيت فيها كل مكان

و ندخلها الفرن لمدة 20 دقيقة تقريبا او إلين تستوي و تتحمر..

وانتظروا عليها لين تبرد تماما بعد الفرن

و بالعافية..