اهلن و سهلن

الأسبوع الماضي المفروض اسميه اسبوع التشكن فنقرز في بيتنا خخخخ مع ان اهلي مايحبون القلي بكثرة بس ادمنوا عليه ..

و اللي بأشرحه مش مجرد وصفة و بس! كان اهتمامي كله انه ينجح الطعم من الداخل و الخارج 

مشكلة الدجاج كل جزء فيه يبيله معامله خاصة.. سواء تعزيز نكهة او تتبيل بالبهارات او تنقيعها بمحلول ملحي (برايننق) عشان نحافظ على طراوتها

وهنا بالوصفة راح اشرح عن التتبيل و طريقة القلي او درجة الحرارة المناسبة

مهم مهم و مليون مهم القلي هنا لو اهملتوا هذي الخطوة عمره ماينجح حتى لو طبقتوا الوصفة من اولها صح

القلي كله ماياخذ ٤ دقايق بسبب اننا قلينا في درجة الحرارة المناسبة، لا زودنا درجة الحرارة و حرقناه ولا قللنا و خليناه غرقان و يسبح بالزيت

بالنسبة لتعزيز الطعم بعد التكنيك سويت مع التشكن فنقرز ثلاث صوصات و هي صوص سبايسي و ثوم، و هني ماسترد و الرانش

انا صبيت الصوصات كلها على التشكن فنقرز مثل ماشفتوا في الصوره و طلع  تكوين رهيب مع بعض  

او تخلونها في صحون متفرقة حسب ماتحبون

—-

المقادير:

٥٠٠ جرام صدور دجاج مقطعة مثل الأصابع بشكل طولي

لبن للتبيلة 

م ص اوريغانو ناشف

 م ص بودرة ثوم 

 م ص بودرة بصل

نص م ص فلفل احمر بودرة

م ص و نص ملح

٢ بيض مخفوق

دقيق و بقسماط للتغليف يفضل بقسماط بانكو الياباني

التتبيلة اختيارية تقدرون تكتفون بالاوريغانو و الفلفل بس او تزيدون الفلفل و تخلونه سبايسي بس كمية الملح ابدا لا تلغونها

مقادير الصوصات:

التشيلي و الثوم

١ فص ثوم/ ١ م ك فلفل احمر حار مفروم / ٢ م ص سكر / ٢ م ص خل / ٢ م ك صويا صوص

صوص الرانش:

نص كوب لبن/ ثلث كوب مايونيز/ بقدونس مفروم/اوريغانو فرش مفرم او م ص اوريغانو ناشف/ ملح و فلفل اسود

الهني ماسترد:

٢ م ك ماسترد / م ك عسل

—————————

نحط الدجاج المقطع في صحن ونخلطه مع كل البهارات ماعدا الملح بعدين نصب اللبن لين يغطي سطح الدجاج بعدين نضيف الملح و نخلط و نغطي الصحن بالنايلون و ندخله الثلاجه ليلة كاملة

هذي التتبيلة راح تعمل عمل البرايننق تقريبا بما انه تبلنا الدجاج بشي حمضي راح يساعد على طراوته لبعد الطبخ

اليوم الثاني نغلف الدجاج بالدقيق اول بعدين البيض بعدين البقسماط

و نسخن الزيت لين توصل لدرجة حرار ٣٢٥ فهرنهايت/ ١٥٥ سيليزيوس

و نقلي لين يقلب لونه ذهبي تقريبا تاخذ من ٣ ل ٤ دقايق

انا شخصيا احب احط اي شي مقلي على شبْك و تحته ورق مطبخ عشان يحافظ على قرمشته من غير مايرطب نتيجة تلاصق الورق بالشي المقلي

بالنسبة للصوصات كلها تخلط عادي و ممكن تحفظونها في علب لوقت التقديم

ماعدا صوص التشيلي و الثوم يبيله طبخ

اول شي نحمس الثوم لين يصير ذهبي و نضيف باقي المقادير و نطبخ على نار واطية لمدة ٥ دقايق او اقل بشوي و نتركه لين يبرد

ياتقدمون الصوصات مثل ماسويت او تحطونه بصحون متفرقة

و بالعافية