مرحبا

البنانا بريد من اسهل و اسرع الوصفات في حالة لو عندي موز مستوي و طري زايد..و انا هنا سويته سادة من غير مكسرات او اي اضافة ثانية 

ممكن تضيفون جوز او بيكان (الجوز الأمريكي) او مكس بيريز يعني انواع توت مختلفة وقد سويتها قبل لذيييييييذة بشكل لدرجة الكل اخذ الطريقة مني مع اني ماتوقعت راح تعجبهم 

يعني الحرية لكم و ان شاء الله تعجبكم الطريقة

المقادير:

كوبين دقيق

ثلاث ارباع م ص بيكربونات الصودا او بيكنج صودا

ملاحظة : كثير يلخبطون بين بيكربرونات الصوديوم و الصودا كلهم مختلفين تماما فانتبهوا عشان لا تخرب وصفتكم  

نص م ص ملح

بيضتين بدرجة حرارة الغرفة

نص كوب زبدة طرية

نص كوب سكر بني غامق او فاتح ..انا استخدمت الغامق

نص كوب سكر ابيض

كوب و نص موز مهروس

حاولوا تختارون موز مستوي مررا و طري ولو قلب القشر كله اسود يكون افضل بس اهم شي مستوي

————————————————–

نشغل الفرن على درجة حرارة 325 فهرنهايت او 180 سيلزيوس

مساحة الصيينية او القالب  8 ونص إنش  في 4 ونص إنش

نغلف الصينية بورق الزبدة افضل

في خلاط الكيك نخلط الزبدة و نوعين السكر لحد مايصير عندنا قوام ناعم ومتجانس

 ملاحظة: قبل ماتضيفون السكر البني حاولوا تفتتونه بإيدينكم عشان تتأكدون مافيه كور متجمعة

و نخلي سرعة الخلط على أبطأ شي و نضيف كل مرا بيضة مو كل الثنتين سوا لين يتجانس

بعدين في صحن ثاني نخلط المواد الجافة مع بعض (دقيق+ملح+بيكنج صودا) و نضيف على خليط السكر و البيض مرا دقيق و مرا موز مهروس و السرعة على البطئ

لين يتجانس و نصبه في القالب و ندخله الفرن لمدة ساعة او اقل حسب حرارة فرنكم انا اخذ معاي ساعة  و بعد الفرن نتركه لين يبرد 

و بالعافية