صباح الخييير

انا ادري فيه كثير منكم متضايق ان البلوق مافيه وصفات فطور، تبون الصراحة انا وجبة الفطور ناااادرا ما اطبخ يعني غالبا اشياء سريعة و سهلة ماتحتاج اني انزل تدوينه عشانها

  او تكون ساندويتشات من اشياء موجودة بالثلاجة بس ان شاء الله فيه كذا وصفة سهلة للفطور راح انزلها لكم

الاومليت الأسباني هو عبارة عن طبقة سميكة (أسمك من الوصفة اللي نزلتها لكم) من البيض و شرايح بطاطس تطبخ على شكل قرص دائري، وهو طبق مفضل عند الأسبان عالفطور

البيض و البطاطس هي الطريقة الأصليه او التقليدية للاومليت بس انا حبيت اغير و اضفت مكونات غير، اللي هو السبانخ و المشروم و شوي لوز شرايح محمص و جبن بارميزان

و برضو تصلح كوجبة عشا مو بس للفطور

المقادير تكفي لشخصين او ل ٣ أطفال

و هالكمية تكفي لمقلاه صغيره غير قابلة للالتصاق  من ٤ ل ٦ انش و كل ماكبرت المقلا زيدوا كمية البيض لأن لازم قرص البيض يكون سميك

——-

المقادير:

٣ بيضات كبيرة الحجم مخفوقة

م ك بقدونس مفروم

نص حزمة سبانخ

حبتين مشروم كبار مقطعة مكعبات صغيرة او ثلاث حبات صغار

 ٥ حبات بصل شالوت

ثلث كوب جبنة بارميزان مبشوره

ربع كوب لوز مبشور محمص

ملح و فلفل اسود

———————-

نشغل الفرن على درجة حرارة ٢٠٠ سيليزيوس

نفرم الشالوت و نقطع المشروم لمكعبات صغيرة

و بعدين نحمس الشالوت و المشروم بزيت زيتون لين يذبل المشروم و تطلع مويته

نضيف اوراق السبانخ و نقلب لين تتقلص حجمها و آخر شي اللوز المحمص و الملح و الفلفل الأسود

نضيف على البيض المخفوق البقدونس المفروم و برضو شوي ملح و فلفل اسود

نوطي النار و نصب البيض و نوزع بشكل سريع خليط البيض مع خلطة السبانخ و المشروم و نخليه يطبخ لمدة دقيقتين او لحد ماتشوفون ان البيض ثبت و استوا، نضيف البارميزان المبشور و ندخله الفرن من فوق لمدة ٥ دقايق لين يذوب الجبن و يحمر

و بالعافية