مساء الخير

في مناطق شرق آسيا يكثر استخدامهم للكاري او خلطة البهارات المشكلة  حسب الكويزين من منطقة لأخرى، يعني تبع لذلك ان الكاري مو نكهة وحده ولا شكل واحد ولا محصور ببهارات معينة، فيه المعجون الرطب و البهار المخلوط الناشف

انا مرا وصلني بهار كاري من وحدة هندية لونه اصفر فاقع مختلف عن اللي اسويه و عن كاري السوق الجاهزو برضو في الهند مليون خلطة حسب المنطقة و  قيسوا عليه الكاري السيرلانكي بأنواعه و السنغافوري و البنغالي و التايلاندي

الكاري التايلاندي أساس الكويزين التايلاندي و اهم مكون لوصفات كثير مثله مثل البهارات المشكلة عندنا، الأحمر و الأخضر نفس المقادير باختلاف لون الفلفل الحار و زيادة معاه اوراق الكزبره

من الأطباق اللي سويتها كاري دجاج الأخضر، ربيان بالكاري الأحمر ، كاري اللحم الأحمر مع صوص حلو بالفول السوداني (هذا رهيب) و كراب كيك استخدمت فيه الكاري الأحمر

انا راح انزل طريقة كراب كيك و كاري اللحم الأحمر 

مقادير الكاري اللي بتكلم عنها هي أساسية للأحمر و الأخضر

الفلفل الحار

الفلفل في العالم انواع لا تعد ولا تحصى، وخصوصا بشرق آسيا فيه الهندي و الكوري و الياباني و التايلاندي، بالنسبة لنوع الفلفل في الكاري انا الاحظ البعض يستخدم نوع مجفف ماقد شفته في البقالات الآسيوية هنا او برا، واحذروا من النوع التايلاندي

Friery bird’s eye

اللي يكون صغير مرا نص الخنصر وسميك فأنا استخدمت الفلفل الأحمر الصغير موجود غالبا في قسم الخضار الآسيوي

الربيان المعجون او المهروس – Blachan

مصنوع من الربيان المملح و المجفف في اجواء حارة و رطبة , و اللون يختلف حسب نوع الربيان و يجي على شكل مكعبات بس انا لقيته بأكياس مثل الصورة و جبته من برا

وله اسماء مختلفة

blachan, terase, trassi, kapi, nagapi

هذا المعجون ريحته قوية بس لا تحكمون عليه من الريحة لأن طعمه مختلف تماما عن الريحة، ماقد شفته هنا بس يمكن بالتميمي بالرياض او الشرقية موجود لأن كل مرا يفشلوني بتويتر عن اي منتج مستورد و يطلع احد يقول موجود عند التميمي من زمان هههههههههه

اضافته بنسبه قليلة جدا يعني مايأثر كثير في حالة لو ماتوفر

الكافير لايم

من عائلة الحمضيات بس مو ليمون! و يستخدم القشر فقط بس بما ان مو متوفر هنا فأستخدمت الأوراق 

في حال لو شريتوا كمية كبيره من اوراق الكافيير لايم حطوها في علبه قزاز و غطوها و تنحفظ في الثلاجة

الخولنجان – galngan

من عائلة الزنجبيل بس مو بديل للزنجبيل ولا يعطي نفس النكهة، فيه منه مجفف اللي نستخدمه دايم للكبسات او لبعض الطبخات التقليدية، الخولنجان الرطب متوفر دائما في قسم الخضار الآسيوية بالدانواب

ليمونغراس

من الأعشاب العطرية المعمره و شكله يشبه البصل الأخضر و يعتبر مكون اساسي في كل اطباق الكويزين التايلاندي

و باقي المقادير – كمون حب – كزبرة ناشفة حب – ثوم – وبصل شالوت (البصل الصغير) او بصل احمر  و ملح

انا سويت الكاري اكثر من مرا بس عشان تحافظون على اللون لا تكثرون من الكمون و الكزبرة، يقلب لون الكاري للبني بسببهم و راح تشوفون بالصور الطريقة ان لون الكاري حقي بني بسبب اني زودت كمية الكزبرة اناشفة

بالمقابل لما قللت البهارات العدلة صار لونه طبيعي من لون الفلفل

المقادير نفسها بالضبط للكاري الأخضر مع تغيير لون الفلفل و اضافة كزبرة خضرا

—–

مقادير الكاري الأحمر

١٢ حبه فلفل احمر حار

م ص كزبرة ناشفة

نص م ص كمون

م ك ليمونغراس

م ك خولنجان رطب

فص ثوم

حبتين بصل شالوت او ربع حبه بصل

١ ورق كافيير لايم

نص م ص ربيان معجون

————–

انا هرست الكاري بالهاون الحجر لأن ما احبه  مهروس بالمرة بس تقدرون تسوونه بالطاحونه

اول شي ندق البهارات الناشفة

و بعدين نحط باقي المقادير مع الملح ماعدا الربيان المعجون

و آخر شي حطيت الربيان المهروس

واذا كان الكاري الأخضر نضيف كزبرة خضرا

انا احفظ الكاري بالثلاجة في حال لو باستخدم هالكمية في نفس الاسبوع او استخدم منه شوي و افرزن الباقي في اكياس صغيره متفرقه